Farmer Incentive Scheme : प्रोत्साहनपर अनुदान तातडीने देण्याची मागणी

Farmer Loan Waive Scheme कोल्हापूर : नियमित कर्ज परतफेड करणाऱ्या शेतकऱ्यांसाठी जाहीर केलेल्या प्रोत्साहनपर अनुदानाची (Incentive Subsidy) यादी येऊन महिना होऊन गेला तरीही प्रत्यक्ष शेतकऱ्यांच्या खात्यावर पैसेच जमा झालेले नाहीत.

ही रक्कम मिळावी यासाठी स्वाभिमानी शेतकरी संघटनेचे संस्थापक राजू शेट्टी (Raju Shetti) यांनी राज्याचे मुख्य सचिव मनुकुमार श्रीवास्तव यांची भेट घेतली. फेब्रुवारीअखेर वित्त विभागाच्या मान्यतेनंतर मार्चअखेर हे अनुदान शेतकऱ्यांच्या खात्यावर जमा करणार असल्याची माहिती मुख्य सचिवांनी दिली.

शासनाच्या घोषणेनंतरही तब्बल एक महिन्याने पहिली यादी आली. या यादीत नाव असलेल्या शेतकऱ्यांनी शासनाच्या पोर्टलवर जाऊन आधार प्रमाणिकरण केले, त्याचा संदेशही संबंधितांच्या मोबाइलवर आला, पण प्रत्यक्ष रक्कम अद्याप खात्यावर जमा झाली नाही.

शासनाच्या नियमानुसार ज्या दिवशी आधार प्रमाणीकरण होईल, त्याच दिवशी ही रक्कम जमा होणार होती. म्हणून शेतकरी बँकेत हेलपाटे मारत आहेत, पण शासनाकडून निधीच न आल्याने ही रक्कम जमा न झाल्याचे बँकेकडून सांगण्यात येत आहे.

या भेटीनंतर मुख्य सचिवांनी राज्याचे सहकार सचिव व वित्त सचिवांना ज्या शेतकऱ्यांचे आधार प्रमाणीकरण झालेले आहे, अशा दुसऱ्या यादीतील शेतकऱ्यांचे अनुदान येत्या आठवड्याभरात जमा करण्याच्या सूचना देऊन सदरचे अनुदान तातडीने वितरित करण्याबाबत आदेश दिले.

सध्या तिसऱ्या यादीतील अनुदानाचा प्रस्ताव वित्त विभागाकडे असून, फेब्रुवारीअखेर ही मान्यतेची प्रक्रिया पूर्ण करून पुरवणी मागणीतून मार्चअखेरपर्यंत सर्व अनुदानाची रक्कम शेतकऱ्यांच्या खात्यावर जमा होणार असल्याचे सांगितले.