Crop Damage Survey : आंबेगावच्या पूर्वभागात गारपिटीने नुकसानीचे पंचनामे करा

Unseasonal Rain News पारगाव : आंबेगाव तालुक्याच्या पूर्वभागात काल शनिवारी सायंकाळी झालेल्या गारपिटीने (Hailstorm) नुकसान झालेल्या शेतातील पिकांचे तातडीने पंचनामे (Crop Damage Survey) करा, अशी माहिती तहसीलदार रमा जोशी यांनी दिली.

तालुक्याच्या पूर्वभागातील धामणी, लाखणगाव, खडकवाडी, जारकरवाडी, पोंदेवाडी, वाळुंजनगर, रोडेवाडीफाटा, बढेकरमळा ज्ञानेश्वरवस्ती द्रोणागिरीमळा या परिसराला काल शनिवारी सायंकाळी गारपिटीचा जबरदस्त तडाखा बसला असून रस्ते शेतात, गोठ्यात, घराच्या अंगणात गारांचा अक्षरशः खच पडला आहे

गारांच्या माऱ्याने शेतातील पिकांचे मोठ्या प्रमाणात नुकसान झाले आहे हातातोंडाशी आलेली पिके नष्ट झाली आहे. रविवारी सकाळी तहसीलदार रमा जोशी यांनी या सर्व गावांना भेट देऊन थेट नुकसान झालेल्या शेतात जाऊन नुकसानीची पाहणी केली तसेच नुकसानग्रस्त शेतकऱ्यांशी संवादही साधला

त्यांच्या समवेत नायब तहसीलदार दामूराजे असवले, पारगाव तर्फे अवसरी बुद्रूक विभागाचे मंडल अधिकारी विश्वास शिंदे, तलाठी विशाल मुंगळे, कृषी सहाय्यक प्रवीण मिर्के , कृषी सहाय्यक निशा शेळके, कोतवाल विकास दाभाडे, कोतवाल सुभाष पंडित हे होते.

यावेळी बोलताना तहसीलदार रमा जोशी म्हणाल्या, की नुकसान झालेल्या शेतातील पिकांचे तातडीने पंचनामे करण्याचे आदेश देण्यात आले आहे.

तसेच शासकीय कर्मचाऱ्यांचा संप सुरु असतानाही आज रविवार सुट्टीचा वार असूनही महसूल तसेच कृषी विभागाचे कर्मचारी हे या पाहणी दौऱ्याच्या वेळी हजर होते तसेच सर्व कर्मचाऱ्यांना गारपीटीच्या नुकसानीचे पंचनामे करण्यासाठी कामावर रुजू होण्याच्या सूचनाही त्यांनी यावेळी दिली.

यावेळी धामणी येथे सरपंच रेश्मा बोऱ्हाडे, ग्रामपंचायत सदस्य प्रतीक जाधव, अक्षय विधाटे, श्याम बढेकर, संजय बढेकर, सुरेश विधाटे, सुरेश बढेकर, गोरक्ष विधाटे, पोलिस पाटील कल्पिता बोऱ्हाडे, शिरीष रोडे पाटील, उपसरपंच महेंद्र पोखरकर, अमोल वाळुंज, संदीप पोखरकर, जयसिंग पोंदे, सुशांत रोडे या शेतकऱ्यांनी गारपिटीने झालेल्या नुकसानीची माहिती दिली.