Jalgaon Dairy : महाविकास, भाजप, शिंदे गट एकत्र आणण्यासाठी प्रयत्न

जळगाव : जिल्हा दूध संघाच्या (Jalagaon Dairy Election) संचालकपदाच्या निवडणुकीत आता रंग भरू लागला आहे. यातच संघाचे सभासद खेमचंद महाजन (Khemchand Mahajan) यांनी दोन्ही गटांतील १८ उमेदवारांविरुद्ध दाखल केलेली याचिका उच्च न्यायालयाने फेटाळून लावली आहे.

यातच संघाच्या निवडणुकीतून राज्याचे ग्रामविकासमंत्री गिरीश महाजन माघार घेण्याची शक्यता आहे. सर्वच पदे आपल्या घरात यावरून एकनाथ खडसे व महाजन यांच्यात जोरदार कलगीतुरा रंगला. यामुळे महाजन आपल्या समर्थकास पुढे करून या निवडणुकीतून बाहेर पडतील, असे दिसत आहे.

निवडणुकीत राष्ट्रवादी, शिवसेना व काँग्रेसची महाविकास आघाडी विरुद्ध भाजप, शिंदे गट, अशी लढत होणार आहे. दोन्ही गटांनी आता कंबर कसल्याचे दिसत आहे. अगदी आरोप- प्रत्यारोप ते थेट न्यायालयीन लढाई सुरू आहे. उमेदवारी माघार घेण्याची मंगळवारी (ता. २९) अंतिम मुदत आहे. मात्र आतापासून दोन्ही गटांनी मोर्चेबांधणी सुरू केली आहे.

आघाडी व भाजप, शिंदे गटाच्या बैठकांचे सत्र सुरू आहे. पण ही निवडणूक बिनविरोध व्हावी यासाठी आघाडी व शिंदे गटाचे काही उमेदवार प्रयत्न करीत आहेत. त्यासाठी मुंबईत आपापल्या नेत्यांच्या भेटीगाठीदेखील या उमेदवारांनी घेतल्याची माहिती आहे.

दरम्यान, सभासद खेमचंद महाजन यांनी १८ उमेदवारींवर हरकत घेणारी याचिका उच्च न्यायालयात दाखल केली होती, ती फेटाळून लावल्याने दोन्ही गटातील उमेदवारांचा निवडणूक लढण्याचा मार्ग मोकळा झाला आहे.