Summer Sowing : उन्हाळी हंगामात मुगाला पसंती

Pune News यंदा रब्बी पेरणीसाठी पोषक हवामान होते. पण उन्हाळी पिकांची लागवड बदलत्या वातावरणामुळे काहीशी प्रभावित होत आहे. यंदा गेल्या वर्षीपेक्षा उन्हाळी लागवड काहीशी घटली. तर उन्हाळी हंगामात शेतकऱ्यांनी कडधान्य आणि भरडधान्याला प्राधान्य दिल्याचे दिसते.

केंद्रीय कृषी मंत्रालयाने दिलेल्या माहितीनुसार, देशात आतापर्यंत उन्हाळी पिकांची लागवड ६५ लाख २९ हजार हेक्टरवर झाली. गेल्या वर्षी याच काळातील लागवड ६६ लाख हेक्टरवर होती.

म्हणजेच यंदा गेल्या वर्षीपेक्षा पिकांची लागवड काहीशी घटली आहे. यंदाच्या हंगामात कडधान्य आणि भरडधान्य पिकांना पसंती मिळताना दिसत आहे. तर यंदा भात आणि तेलबिया पिकांची लागवड कमी झाली.

उन्हाळी हंगामात कडधान्य पिकांची लागवड वाढली. आतापर्यंत देशात १७ लाख ५७ हजार हेक्टरवर उन्हाळी पिकांची लागवड झाली. तर गेल्या हंगामात याच काळातील लागवड १६ लाख २३ हजार हेक्टरवर होती.

कडधान्यामध्ये मुगाला सर्वाधिक पसंती मिळत आहे. मुगाची सर्वाधिक १४ लाख २७ हजार हेक्टरवर लागवड झाली. मागील हंगामात १२ लाख ८३ हजार हेक्टरवर लागवड दिसत होती.

तर उडदाची लागवड मात्र काहीशी घटली आहे. यंदा उडदाखाली ३ लाख ८ हजार हेक्टर क्षेत्र आहे. मागील हंगामात याच काळातील लागवड ३ लाख १२ हजार हेक्टर होती.

भरडधान्यात मक्याला पसंती

भरडधान्यामध्ये उन्हाळी लागवडीत मक्याला पसंती मिळाली. भरडधान्याखाली सध्या १० लाख ८६ हजार हेक्टर क्षेत्र आहे. गेल्या हंगामात याच काळातील लागवड १० लाख १९ हजार हेक्टरवर होती.

मक्याची ६ लाख ३० हजार हेक्टरवर लागवड झाली. गेल्या हंगामातील लागवड ६ लाख २४ हजार हेक्टरवर होती. बाजरीची लागवडही ३ लाख ५९ हजार हेक्टरवरून यंदा ४ लाख २९ हजार हेक्टरवर पोहोचली.

तेलबियांची लागवड घटली

उन्हाळी हंगामात तेलबिया लागवड मात्र घटली आहे. तेलबिया पिकांची लागवड यंदा ९ लाख ४० हजार हेक्टरवर झाली. गेल्या हंगामात १० लाख ४६ हजार हेक्टर क्षेत्र होते. भुईमुगाखाली गेल्या हंगामात ५ लाख २७ हजार हेक्टर असताना यंदा मात्र ४ लाख ५० हजार हेक्टरवर लागवड झाली.