Integrated Farming : शेतकऱ्यांनी एकात्मिक शेती पद्धतीवर भर द्यावा ः डॉ. पाटील

सोलापूर ः ‘‘कृषी समृद्ध आदर्श गाव निर्मितीसाठी कृषी विज्ञान केंद्र (Krishi Vidnyan Kendra) हे उत्तम माध्यम आहे. शेतकऱ्यांनी कृषी विज्ञान केंद्राच्या तंत्रज्ञानाचा अधिकाधिक उपयोग करताना, एकात्मिक शेती (Integrated Framing) पद्धतीवर भर द्यावा,’’ असे मत महात्मा फुले कृषी विद्यापीठाचे कुलगुरू डॉ. पी. जी. पाटील यांनी व्यक्त केले.

महात्मा फुले कृषी विद्यापीठ, राहुरीअंतर्गत कृषी विज्ञान केंद्र, मोहोळ येथे शास्त्रीय सल्लागार समितीची बैठक झाली. त्या वेळी ऑनलाइन पद्धतीने डॉ. पाटील आणि अटारी पुणेचे संचालक डॉ. लाखनसिंग या बैठकीत सहभागी झाले होते.

कृषी विद्यापीठाचे विस्तार शिक्षण संचालक डॉ. टी. के. नरुटे, विभागीय कृषी संशोधन केंद्राचे प्रमुख शास्त्रज्ञ डॉ. विजय अमृतसागर, जिल्हा अधीक्षक कृषी अधिकारी बाळासाहेब शिंदे, ‘नाबार्ड’चे जिल्हा व्यवस्थापक नितीन शेळके, रेशीम विस्तार अधिकारी विश्‍वजित पावसकर, कार्यक्रम समन्वयक डॉ. तानाजी वळकुंडे, प्रगतिशील शेतकरी संदीप पवार, स्वाती पाटील, ओंकार वाटाणे, राजाभाऊ भंगिरे, गणेश माळी, ए. पी. गलांडे आदी उपस्थित होते.

डॉ. पाटील म्हणाले, ‘‘पारंपरिक गोवंश संवर्धनाबरोबर शेतकऱ्यांनी पूरक आणि प्रक्रिया व्यवसाय करावा. येणारे २०२३-२४ हे वर्ष आंतरराष्ट्रीय भरडधान्य वर्ष असल्यामुळे केव्हीकेमार्फत जास्तीत जास्त भरडधान्यावर कार्यक्रम राबविणे आवश्यक आहे. याशिवाय आधुनिक शेती तंत्रज्ञानाबाबत शेतकरी उत्पादक संस्था, शेतकऱ्यांच्या समूह गटामार्फत ड्रोन तंत्रज्ञानाने शेतीचे व पर्यायी गावाचे उत्पन्न वाढवावे.’’

डॉ. नरुटे यांनी जिल्ह्यातील प्रत्येक तालुक्यामध्ये एक एकात्मिक शेती पद्धतीने विकसित कृषी समृद्ध गाव निर्माण करण्यात केव्हीकेने पुढाकार घ्यावा, असा मानस व्यक्त केला. डॉ. वळकुंडे यांनी पीक प्रात्यक्षिके, प्रशिक्षणे, विविध विस्तार कार्यक्रम व राबविण्यात येणाऱ्या प्रकल्पांचा आढावा सादर केला. तसेच वर्ष २०२३ चा कृती आराखड्याचे सादरीकरण केले. तसेच विविध विषयांवरील घडीपत्रिकेचे प्रकाशन करण्यात आले. शेतकऱ्यांच्या कृषी प्रक्रिया उद्योजकांच्या उत्पादनांची मांडणी करण्यात आली.