Fertilizer : खत परवाना कारवाई संशयाच्या भोवऱ्यात

अमरावती : कृषी अधिकारी बदलताच नकारात्मक अहवाल सकारात्मक दाखवून खत (Fertilizer) विक्रेत्यांच्या परवाना रद्दची कारवाई स्थगित करून त्याऐवजी ४० दिवसांच्या कालावधीकरिता निलंबन करण्यात आल्याचा धक्कादायक प्रकार समोर आला आहे. अकोला येथे घडलेल्या या प्रकाराची तक्रार शेतकऱ्यांसह शिवसेनेने केल्यानंतर विभागीय कृषी संचालक सहसंचालक यांनी याप्रकरणी चौकशीचे आदेश दिल्याने खळबळ उडाली आहे.

अकोल्याचे तत्कालीन प्रभारी जिल्हा अधीक्षक कृषी अधिकारी कांताप्पा खोत (Kantappa Khot) यांनी शेतकऱ्याची तक्रार तसेच एक व्हायरल व्हिडिओची दखल घेत पाटणी ट्रेडर्स या खतविक्रेत्यावर कारवाई केली होती. तपासणीअंती ही कारवाई करण्यात आली. त्या वेळी साठा पुस्तिकेत नोंद असतानाही गोदामात मात्र खत नव्हते. पॉस मशिनद्वारे खत विक्री न करणे, लिंकिंग करून खत विकणे, लिंकिंग साहित्य घेण्यास नकार देणाऱ्या शेतकऱ्याला अपमानित करून बाहेर काढणे या बाबी समोर आल्या होत्या, त्याची नोंद अहवालात देखील घेण्यात आली आहे.

या आधारे पाटणी ट्रेडर्सचा किरकोळ खतविक्री परवाना रद्द करण्यात आला. मात्र त्यानंतरच्या घडामोडीत कृषी सेवा केंद्रधारकांनी तत्कालीन जिल्हा अधीक्षक कृषी अधिकारी खोत हे पैशाची मागणी करीत असल्याचा आरोप केला. त्यांचे निलंबन अथवा बदली करावी, अशी मागणी त्यांनी केली. दबाव वाढल्याने ते रजेवर गेले. या दरम्यान, जिल्हा अधीक्षक कृषी अधिकारी पदाचा प्रभार आरिफ शहा यांच्याकडे सोपविण्यात आला. त्यांनी परवाना रद्दची कारवाई स्थगित करून ४० दिवसांकरिता परवाना निलंबनाचे आदेश दिले आहेत. त्यामुळे हे सर्व प्रकरण सशंयाच्या भोवऱ्यात सापडले आहे. विशेष म्हणजे गुण नियंत्रण अधिकारी नितीन लोखंडे यांनी या प्रकरणात महत्त्वाची भूमिका बजावल्याचा संशय आणि आरोपदेखील शिवसेना नेते गोपाल दातकर यांनी तक्रारीत केला आहे.