NIASM Baramati : माळेगावात अजैविक व्यवस्थापन संस्थेचा स्थापना दिवस साजरा

Baramati News माळेगाव : राष्ट्रीय अजैविक ताण व्यवस्थापन (NIASM Baramati) संस्थेचा १५ वा स्थापना दिवस नुकताच साजरा करण्यात आला. या वेळी संस्थेच्या वैज्ञानिक, तांत्रिक, प्रशासकीय कंत्राटी कर्मचारी, प्रगतिशील शेतकऱ्यांना त्यांच्या योगदानाबद्दल पुरस्कार देऊन गौरविले. या वेळी १५ प्रगतिशील शेतकऱ्यांना पुरस्कारही देण्यात आला.

या वेळी संचालक डॉ. के. सॅमी रेड्डी यांनी संस्थेने संशोधन, शिक्षण आणि कृषी प्रसार क्षेत्रामध्ये केलेल्या कामगिरीवर प्रकाश टाकला. संस्थेच्या कर्मचाऱ्यांनी केलेल्या कार्याबद्दल आणि संस्थेच्या भविष्यातील वाढीसाठी आवश्यक सुधारणांवर चर्चा करण्यात आली. कार्यक्रमाचे निमंत्रक डॉ. नितीन कुराडे यांनी मार्गदर्शन केले.

या वेळी एकात्मिक शेती प्रकल्प, शेळीपालन आणि सुफलाम् हिंदी पत्रिकेचे प्रकाशन करण्यात आले. डॉ. एनव्हीपीआर गंगाराव, मुख्य शास्त्रज्ञ, सिमिट, नैरोबी, केनिया यांनी पीक प्रणालीमध्ये प्रभावी अजैविक तणाव व्यवस्थापनासाठी पीक सुधारणा दृष्टिकोन या विषयावर मार्गदर्शन केले.

मार्गदर्शनामध्ये बाजरीचे क्षेत्र आणि उत्पादकता, मलावी आणि इतर आफ्रिकन राष्ट्रांमधील तुरीची क्रांती या विविध पैलूंवर लक्ष केंद्रित केले. डॉ. हरीश गांधी, मुख्य शास्त्रज्ञ, सिमिट यांनी संस्थेच्या कर्मचाऱ्यांचे कौतुक केले. मृदा ताण विभागाचे प्रमुख डॉ. अर्जुन तायडे यांनी आभार मानले.