Grape Crop Damage : लेकरासारखं सांभाळलेल्या द्राक्षाचा अवकाळीने घात

चांदोरी, ता. निफाड : आभाळ फाटलं, काळीज तुटलं, हाताच्या फोडासारखं पिकांना जपलं अन् अवकाळी पावसाने सारं हिरावलं, अशी विदारक स्थिती रविवारी (ता.९) चांदोरीत पाहायला मिळाली. लेकरासारखं सांभाळलेल्या बागांचा रविवारी झालेल्या अवकाळीने (Unseasonal rain) घात केला आहे.

वादळी वाऱ्यात ३० एकरांवर द्राक्षबागा (Graoe crop) भुईसपाट झाल्या आहेत. तर १०० एकरांपेक्षा जास्त क्षेत्रावर कोट्यवधी रुपयांचे नुकसान झाले आहे.

गेल्या दीड महिन्यात तीनदा अवकाळीने चांदोरीसह परिसराला दणका दिला आहे. फळबागांचे लाखो रुपयांचे नुकसान झाले आहे.

वादळी वाऱ्यात अनेक द्राक्षबागा भुईसपाट झाल्या आहेत. वारंवार अवकाळीने शेतकऱ्याला उध्वस्त केले आहे.

निफाड तालुक्यातील चांदोरी, खेरवाडी, चितेगाव, सुकेणे परिसराला वादळी वाऱ्यासह अवकाळीचा फटका बसला. या पावसाचा फटका गहू, कांद्याला देखील बसला आहे. चांदोरीतील संजय कोरडे या शेतकऱ्याने दोन एकर द्राक्ष बाग जोपासली होती.

मात्र ही बाग आडवी झाली आहे. गेल्या वर्षी कोरोनामुळे अन यंदा पावसामुळे बाग वाया गेली. यामध्ये सात ते आठ लाख रुपयांचे नुकसान झाल्याचे कोरडे यांनी सांगितले.

त्यांच्यासह बाळासाहेब आहेर, संजय कोरडे, भाऊसाहेब खर्डे, प्रवीण कोरडे, विष्णू गायखे, सोमनाथ लोंढे, सुरेश गडाख आदींच्या द्राक्षबागा भुईसपाट झाल्या आहेत. इतर शेतकऱ्यांच्या द्राक्षबागेतील मण्यांना तडे गेले आहेत.

बागा उतरतानाच पावसाचे थैमान
चार दिवसांपासून पुन्हा द्राक्ष काढणीला सुरुवात झाली आणि पुन्हा अस्मानी संकटाने दणका दिला. चांदोरीमध्ये द्राक्षाच्या बागा उतरण्याचे काम सुरु आहे. नेमक्या याचवेळी पावसाने थैमान घातले आहे. यामध्ये शेतकऱ्यांचे मोठे नुकसान झाले आहे.

प्रतिक्रिया ः
पावसाने द्राक्षशेती उद्ध्वस्त होत आहे. ही परिस्थिती अशीच राहिल्यास येत्या दोन-तीन वर्षांत ५० टक्के द्राक्ष बागा शेतकरी काढून टाकतील. द्राक्षशेती वाचवायची असेल, तर शासनाने नुकसानीचे पंचनामे करावेत. तत्काळ मदत द्यावी. अन्यथा भविष्यात द्राक्षशेती मातीमोल होईल.
- बाळासाहेब आहेर, नुकसानग्रस्त शेतकरी.