सिंधुदुर्ग जिल्ह्यात जोरदार पाऊस

सिंधुदुर्गनगरी ः मॉन्सूनचे आगमन (Monsoon Arrival) झाल्यानंतर तब्बल १४ दिवसांनी जिल्ह्यात जोरदार पावसाला (Heavy Rain) सुरुवात झाली आहे. शुक्रवारी (ता.२४) रात्रभर पाऊस (Rain Update) सुरू होता. सरीवर सरी कोसळत आहेत. सतत पडत असलेल्या पावसामुळे नदी, नाले प्रवाहित झाले आहेत. पाण्याच्या पातळीत देखील आता वाढ होऊ लागली आहे. शेतीकामांना देखील वेग आला आहे. काही शेतकऱ्यांनी भातरोपे लागवड (Paddy Planting) करण्याच्या दृष्टीने पूर्वतयारी करण्यास सुरुवात केली आहे.

मॉन्सून दाखल झाल्यापासून हुलकावणी देणाऱ्या पावसाने शुक्रवारी पहाटेपासून जोरदार हजेरी लावली. अधूनमधून पावसाच्या जोरदार सरी आणि त्यानंतर पावसाची रिपरिप असे दिवसभर चित्र होते. परंतु सायकांळनंतर पावसाचा जोर वाढला. शनिवारी (ता. २५) पहाटेपासून जिल्ह्यात दमदार पावसाला सुरुवात झाली आहे. सतत पावसाच्या सरी कोसळत असल्यामुळे आतापर्यंत कोरडे असलेले नदी, नाले प्रवाहित झाले आहेत.

पावसाचा जोर वाढल्यामुळे शेतकऱ्यांमध्ये उत्साहाचे वातावरण आहे. या वर्षीच्या हंगामात आतापर्यंत एकदाही दमदार पाऊस न झाल्यामुळे जोरदार पावसाच्या प्रतीक्षेत शेतकरी होते. या पावसामुळे शेतकऱ्यांनी भातरोपे लागवडीच्या पूर्वतयारीला सुरुवात केली आहे. मे अखेरला तयार केलेल्या भातरोपवाटिकेतील भातरोपे काढणीला देखील काही शेतकऱ्यांनी सुरुवात केली आहे. पावसाचे प्रमाण असेच राहिल्यास येत्या चार-पाच दिवसांत नियमित भातरोप लागवडीला प्रारंभ होण्याची शक्यता आहे.