Satara DCC Bank : मुदत ठेवीच्या व्याजदरात वाढ ः नितीन पाटील

सातारा : जिल्ह्याची अर्थवाहिनी असलेल्या जिल्हा मध्यवर्ती सहकारी बँकेने (Satara DCC Bank) ठेवीदारांना उत्तम व्याज परतावा मिळावा, यासाठी मुदत ठेवीवरील व्याजदरात भरीव वाढ केली आहे, अशी माहिती बँकेचे अध्यक्ष नितीन पाटील (Nitin Patil) यांनी दिली.

अध्यक्ष श्री. पाटील म्हणाले, ‘‘बँकेचे १८१ दिवस ते १ वर्षापेक्षा कमी मुदतीसाठी ५.५० टक्के, १ वर्ष ते १० वर्षांपर्यंत ६.५० टक्के दराने मुदत ठेवीवर व्याजदर लागू केले आहेत. दामदीडपट ठेवीचा कालावधी ७५ महिने १४ दिवस असून, अन्य मुदत ठेवीवरील व्याजदराप्रमाणेच या ठेवींनाही ज्येष्ठ नागरिकांसाठी १ टक्का जादा व्याजदराचा लाभ देण्यात आला आहे.

ग्राहकांना एनईएफटी, आरटीजीएस, एटीएम, रूपे डेबिट कार्ड, एसएमएस अलर्ट, बीटीएल, आयएमपीएस, बीबीपीएस, इंटरनेट बँकिंग, युपीआय, मोबाईल आयएमपीएस, लघू व्यावसायिकांसाठी क्यू आरकोड आदी सुविधा उपलब्ध केल्या आहेत. बँक ठेवीदारांसाठी प्रधानमंत्री सुरक्षा विमा योजना लाभ देत आहे.

यासाठी दोन लाख विमा संरक्षणासाठी प्रीमिअम बँक स्वनिधीतून भरत आहे. जिल्ह्यातील बँकेच्या ३०७ शाखा व १२ विस्तारित कक्षाद्वारे ग्राहकांची सेवा बँक करत आहे. बँकेचे सर्व ठेवीवरील व्याजदर आकर्षक असून पाच लाखापर्यंतचे सर्व ठेवींना विमा संरक्षण आहे.

जिल्ह्याच्या सर्वांगीण विकासासाठी बँकेने ठेवी व कर्जाच्या अनेकविध योजना आखल्या आहेत. त्यामुळे ग्राहकांनी बँकेच्या नजीकच्या शाखेत विविध ठेव योजनेत गुंतवणूक करावी, असे आवाहन बँकेचे उपाध्यक्ष अनिल देसाई, मुख्य कार्यकारी अधिकारी डॉ. राजेंद्र सरकाळे यांनी केले आहे. बँकेच्या कामकाज अनुषंगाने विधानपरिषदेचे माजी सभापती रामराजे नाईक निंबाळकर, आमदार बाळासाहेब पाटील, शिवेंद्रसिंहराजे भोसले, मकरंद पाटील यांचे सातत्याने मार्गदर्शन लाभत आहे.