Weather Update : राज्याच्या काही भागांत अजूनही थंडी कायम

Weather Update पुणे : राज्यात उन्हाचा चटक्यामुळे (Heat) कमाल तापमानात वाढ कायम आहे. मात्र उत्तर महाराष्ट्रासह राज्याच्या काही भागात अद्यापही थंडी (Cold) कायम आहे.

रविवारी (ता. १९) सकाळपर्यंतच्या २४ तासांमध्ये अनेक ठिकाणी कमाल तापमानाचा (Maximum Temperature) पारा ३६ अंशापार होता.

रत्नागिरी येथे राज्यातील उच्चांकी ३८.३ अंश सेल्सिअस तापमानाची नोंद झाली, तर निफाड येथील गहू संशोधन केंद्रात नीचांकी ६ अंश सेल्सिअस तापमानाची नोंद झाली.

कमाल तापमानात वाढ झाल्याने यंदा फेब्रुवारी महिन्यातच उन्हाच्या झळा वाढल्या, दुपारच्या वेळी घामाच्या धारा वाहू लागल्या आहेत. दुसरीकडे पहाटेच्या वेळी गारठाही कायम असल्याने परस्पर विरोधी स्थिती तयार झाली आहे.

कोकणातील रत्नागिरीसह सांताक्रूझ येथे ३७.९ अंश सेल्सिअस तापमान नोंदले गेले. तर मध्य महाराष्ट्रातील सोलापूर आणि विदर्भातील अकोला, वाशीम आणि वाशीम येथे पारा ३६ अंशांच्या पार होता.

राज्याच्या किमान तापमानात हळूहळू वाढ होण्यास सुरूवात झाली आहे. मात्र निफाड येथे हुडहुडी कायम आहे. तर पुणे, जळगाव, धुळे येथे गारठा टिकून आहे. राज्याच्या बहुतांशी भागात किमान तापमान १३ अंशांच्या पुढे गेले आहे.

राज्याच्या कमाल आणि किमान तापमानातील चढ-उतार सुरूच राहण्याची शक्यता हवामान विभागाने वर्तविली आहे.

रविवारी (ता. १९) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३४.५ (९.४), जळगाव - (१०.०), धुळे ३४.०(१०.०), कोल्हापूर ३५.० (१८.५), महाबळेश्वर ३०.९ (१५.४), नाशिक ३३.४ (११.०), निफाड ३४.२(६.०), सांगली ३५.६ (१७.२), सातारा ३४.५ (१३.७), सोलापूर ३६.६ (१६.६),

सांताक्रूझ ३७.९ (१९.०), डहाणू ३१.० (१९.१), रत्नागिरी ३८.३ (१८.५), औरंगाबाद ३५.० (१२.८), नांदेड - (१६.२), परभणी ३५.६(१६.२), अकोला ३६.३ (१४.९),

अमरावती ३५.४(१६.१), बुलढाणा ३२.६(१७.६), ब्रह्मपूरी ३५.७ (१७.९), चंद्रपूर ३२.६ (१७.२), गडचिरोली ३१.६(१३.६), गोंदिया ३३.२ (१५.०), नागपूर ३३.० (१५.४), वर्धा ३५.६(१७.५), वाशीम ३६.२ (१४.८), यवतमाळ ३४.२ (१५.२).