Weather Update : राज्याच्या किमान तापमानात वाढ

पुणे : राज्यात झालेल्या अंशतः ढगाळ हवामानामुळे (Cloudy Weather) किमान तापमानाचा पारा (Temperature) पुन्हा वाढू लागला आहे. बहुतांशी ठिकाणी किमान तापमान १५ अंशांच्या वर गेले आहे. राज्याच्या किमान तापमानातील चढ-उतार सुरूच राहण्याची शक्यता हवामान विभागाने (Weather Department) वर्तविली आहे.

मंगळवारी (ता. २७) उत्तर महाराष्ट्रातील निफाडच्या गहू संशोधन केंद्रात राज्यातील नीचांकी ७ अंश सेल्सिअस तापमानाची नोंद झाली आहे. धुळे येथील कृषी महाविद्यालयात ११ अंश सेल्सिअस तापमान नोंदले गेले. उर्वरित राज्यात किमान तापमानाचा पारा १२ ते २० अंशांच्या दरम्यान कायम होता.

दिवसा उन्हाचा चटका कायम आहे. विदर्भातील अकोला येथे राज्यातील उच्चांकी ३३.३ अंश सेल्सिअस तापमानाची नोंद झाली. उर्वरित राज्यातही बहुतांश ठिकाणी कमाल तापमान सातत्याने ३० अंशांच्या पार आहे. मालदीव आणि कोमोरीन भागातील कमी दाब क्षेत्र निवळले आहे.

उत्तर भारतातील थंडीची तीव्र लाट ओसरू लागली असून, आज (ता. २८) राजस्थानात थंडीची लाट कायम राहण्याचा अंदाज आहे. राजस्थानातील चूरू येथे मंगळवारी (ता. २७) देशाच्या सपाट भूभागावरील नीचांकी ०.५ अंश सेल्सिअस तापमानाची नोंद झाली. पंजाब, हरियाणा, चंडीगड, दिल्ली, राजस्थान, ओडिशासह ईशान्येकडील राज्यात दाट धुक्याची स्थिती राहणार आहे.

मंगळवारी (ता. २७) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३३.० (१५.०), जळगाव ३०.८ (१५.५), धुळे ३०.० (११.०), कोल्हापूर ३१.१ (२१.२), महाबळेश्वर २७.२(१६.४), नाशिक ३०.५ (१२.४), निफाड ३०.४ (७.०), सांगली ३१.६ (२०.१), सातारा ३२.०(१६.६), सोलापूर ३३.२ (२०.७), सांताक्रूझ २९.५(१७.०), डहाणू २८.३ (१५.९), रत्नागिरी ३२.० (२१.०), औरंगाबाद ३०.१ (१३.६), नांदेड ३१.८ (२०.०), परभणी ३१.२ (१६.४), अकोला ३३.३ (१६.६), अमरावती ३२.८ (१६.०), बुलढाणा ३०.५ (१७.६), ब्रह्मपूरी ३२.८ (१७.८), चंद्रपूर ३०.८ (२०.४), गडचिरोली ३०.०(१४.८), गोंदिया ३०.८(१५.५), नागपूर ३०.४ (१७.१), वर्धा ३१.४(१७.९), यवतमाळ ३२.२ (१९.५).