Kharif Sowing : सांगोल्यात ४० हजार हेक्टरवर खरीप पेरणीचे नियोजन

Sangola News : तालुक्यामध्ये पेरणीपूर्व मशागतीची कामे सुरू आहेत. तालुक्याचे सरासरी २२ हजार ७१९ हेक्टर खरिपाचे क्षेत्र आहे. सन २०२३ च्या खरीप हंगामामध्ये ४० हजार ३२५ हेक्टरवर खरिपाची पेरणी अपेक्षित आहे.

खरीप हंगामासंदर्भातील पेरणी, बियाणे व खतांचे संपूर्ण नियोजन कृषी विभागाने केले असल्याची माहिती तालुका कृषी अधिकारी शिवाजी शिंदे यांनी दिली आहे.

तालुक्यात सध्या उन्हाळी मशागतीची कामे सुरू आहेत. शेतामध्ये ट्रॅक्टरद्वारे नांगरणी, फणाटणी कामांबरोबरच शेणखत विस्कटण्याची कामे सुरू आहेत. तालुक्यात सरासरी खरीप क्षेत्र २२ हजार ७१९ हेक्टर आहे. सन २०२१ खरीपमध्ये २९ हजार ८४८ हेक्टर क्षेत्रावर व गतवर्षी २०२२ मध्ये ३१ हजार ९५२ हेक्टर क्षेत्रावर खरिपाची पेरणी झाली होती.

येणाऱ्या २०२३ च्या खरीप हंगामामध्ये ४० हजार ३२५ हेक्टरवर खरिपाची पेरणी अपेक्षित आहे. तालुक्यासाठी यावर्षी खरिपासाठी १५ हजार ८२६ मे. टन रासायनिक खताचे आवंटन मंजूर झाले आहे.

या हंगामासाठी येणाऱ्या अडचणी व खतांचे नियोजन कृषी विभागाने केले आहे. गेल्या वर्षी युरिया खताचा काही प्रमाणात तुटवडा जाणवला होता. यावर्षी खतांचे संपूर्णपणे सूक्ष्म नियोजन केले आहे. गुणवत्ता नियंत्रणासाठी तालुकास्तरीय भरारी पथकाची स्थापना करण्यात आली आहे.

तक्रार निवारणासाठी तक्रार निवारण कक्षही स्थापन करण्यात आला आहे. शेतकऱ्यांनी अधिकृत दुकानदाराकडूनच बियाणे, खते व कीटकनाशके खरेदी करावीत. दुकानदाराकडून पक्के बिल घ्यावे. बॕगवरील किमतीपेक्षा जादा रक्कम देऊ नये.

बियाणे बॕग व लेबल जपून ठेवावे. शेतकऱ्यांनी बीजप्रक्रिया करूनच बियाणांची पेरणी करावी. जमिनीमध्ये पुरेसा ओलावा निर्माण झाल्यावरच म्हणजे ८०-१०० मिमी पाऊस झाल्यावरच पेरणी करावी, असे आवाहन तालुका कृषी अधिकारी शिवाजी शिंदे यांनी केले आहे.

खरीप हंगामातील पीकनिहाय पेरणीचे चित्र

पिकाचे

नाव सरासरी

हेक्टर क्षेत्र खरीप २०२२ चे क्षेत्र (हे.) २०२३ चे प्रस्ताविक क्षेत्र (हे)

बाजरी १५५९६.६ ११०१६.४ १५०००

मका ३९०१.६ १४२५६ १७५००

सूर्यफूल ३८३.८ ४०८० ४२५०

तूर २५७२.२ ९८३.१ १२५०

उडीद ९४ ४०३.९ ६००

मूग ८५.६ १९१.८ ४००

भुईमूग १५४.८ ४१२.७ ५००

सोयाबीन ०.६ २३०.८ ३००

कापूस ०.२ २६४.४ ४००

मटकी ० ११२.७ १२५

एकूण २२७१९.२ ३१९५२.८ ४०३२५