यवतमाळ : बाजार समित्यांची निवडणूक (APMC Election) ३० एप्रिलपूर्वी घेण्याचे आदेश उच्च न्यायालयाच्या नागपूर खंडपिठाने दिले आहे. त्यामुळे आता निवडणुकांच्या कार्यक्रमाकडे सहकार क्षेत्रातील दिग्गजांचे लक्ष लागले आहे.
यवतमाळ जिल्ह्यात १७ बाजार समित्या (भोनोूसोत APMC Election) आहेत. या समित्यांवर अशासकीय सदस्य प्रशासक म्हणून कामकाज सांभाळत होते. अशात निवडणुका घेण्याचे आदेश दिले होते. त्याची तयारी सुरू झाली होती.
काहींनी उच्च न्यायालयाचा दरवाजा ठोठावला तर शासनानेही अध्यादेश निर्गमीत केले. या संपूर्ण प्रकरणाची एकत्रित सुनावणी उच्च न्यायालयाच्या नागपूर खंडपिठात सुरू होती.
या सुनावणीत बाजार समितीतील अशासकीय सदस्यांऐवजी शासकीय सदस्यांची नेमणूक करावी, असे आदेश न्यायालयाने दिले आहेत.
या आदेशान्वये जिल्हा उपनिबंधक किंवा सहाय्यक उपनिबंधकांकडे बाजार समित्यांचा कारभार सोपविण्यात येणार आहे.
तर निवडणुका ३० एप्रिलपूर्वी घेण्याबाबत आदेशात नमूद आहे. त्यामुळे आता सहकार निवडणूक प्राधीकरण कधी निवडणूक कार्यक्रम जाहीर करणार, याकडे लक्ष लागले आहे.
जिल्ह्यात उमरखेड, पांढरकवडा या दोन बाजार समित्या वगळता उर्वरित १५ ठिकाणच्या निवडणुका लवकरच लागण्याचे संकेत आहेत. बाजार समिती निवडणुकांच्या पार्श्वभूमिवर जिल्हा उपनिबंधकांनी सहकारी संस्थांना सदस्यसूची मागितली होती.
या कार्यक्रमाला २९ सप्टेंबरपासून सुरुवात झाली होती. न्यायालयात प्रकरण गेल्याने सर्व प्रक्रिया थांबविण्यात आली होती. आता पुन्हा नव्याने ही प्रक्रिया सुरू होणार आहे.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
