Mushroom : आंबेगाव, जुन्नरमधील आदिवासी महिलांना मशरूमचे प्रशिक्षण

फुलवडे ः शाश्‍वत संस्था जुन्नर व टाटा मोटर्स यांच्या संयुक्त विद्यमाने आंबेगाव व जुन्नर तालुक्यांतील आदिवासी भागातील बचत गटांमधील ९९८ महिलांना मशरूम लागवडीचे (Mushroom Cultivation) प्रशिक्षण देण्यात आल्याची माहिती शाश्‍वत संस्था जुन्नरचे अध्यक्ष बुधाजी डामसे व सचिव दुंदा जढर यांनी दिली.

आदिवासी महिलांना शेतीबरोबरच जोड व्यवसाय म्हणून मशरूम लागवडीचे प्रशिक्षण मिळावे, यासाठी शाश्‍वत संस्था व टाटा मोटर्सचे सीएसआर प्रमुख रोहित सरोज व लीतेश अत्तारदे यांच्याकडे मागणी केली होती. त्यानुसार २५ नोव्हेंबर ते १५ डिसेंबर या काळात आंबेगाव तालुक्यातील कोंढवळ, तेरुंगण, राजपूर, तळेघर, जांभोरी, चिखली, आहुपे, डोण, कोंढरे, तसेच जुन्नर तालुक्यातील ५८ गावांतील आदिवासी महिलांना शाश्‍वत संस्थेच्या कार्यकर्त्या पुष्पा शेळके, मंदा भोकटे, अनिता असवले, पुष्पा नाडेकर, आशा डावखर, जिजा भालचिम यांनी वाड्या-वस्त्यांवर जाऊन महिलांना प्रशिक्षण दिले.

‘‘जे बचत गट मशरूम व्यवसाय सुरू करतील, त्या बचत गटातील महिलांना शाश्‍वत संस्थेमार्फत ५ किलो बीज मोफत देण्यात येणार आहे. बचत गटांनी तयार केलेले मशरूम सुकवून १,२०० ते १,५०० रुपये किलो दराने भीमाशंकर मत्स्य, कृषी व वन उपज प्रोड्यूसर कंपनी खरेदी करणार आहे.

तरी जास्तीत-जास्त महिला बचत गटांनी हा व्यवसाय सुरू करावा,’’ असे आवाहन शाश्‍वत संस्थेमार्फत करण्यात आले आहे. मागील वर्षी आयआयटी पवई यांच्यामार्फत ३५० महिलांना मशरूमचे प्रशिक्षण दिले होते.