पुणे जिल्ह्यात खरिपाच्या अवघ्या सात टक्के पेरण्या

पुणेः जून महिना सुरू होऊन जवळपास एक महिना होत आला आहे. जूनच्या सुरुवातीला पाऊस न पडल्याचा परिणाम खरिपाच्या पेरणीवर (Kharip Sowing) झाला आहे. जिल्ह्यात आतापर्यंत सरासरीच्या एक लाख ८४ हजार २७४ हेक्टरपैकी अवघे १४ हजार ३१९ हेक्टर म्हणजेच सरासरी ७ टक्के पेरणी झाली आहे. पश्‍चिमेकडील पट्ट्यात भात रोपवाटिकेची कामे वेगाने सुरू असून बाजरी, तूर, मूग, उडीद, सोयाबीन या पिकांच्या अत्यंत कमी पेरण्या झाल्या आहेत.

यंदा हवामान विभागाने चांगल्या पावसाचा अंदाज वर्तविला होता. त्यामुळे शेतकऱ्यांनी आर्थिक परिस्थिती नसताना पीककर्ज (Crop Loan) घेऊन खरिपाची तयारी केली होती. अनेकांनी खते, बियाण्यांची खरेदी केली होती. परंतु जूनच्या पहिल्या आठवड्यात पुरंदर, बारामती वगळता उर्वरित भागात कुठेही पाऊस पडला नाही.

दुसऱ्या व तिसऱ्या आठवड्यात पावसाचा चांगलाच खंड पडला. बारामतीत ९७ मिलिमीटर, आंबेगावात ८४, तर जुन्नर व इंदापुरात ७५ मिलिमीटर एकूण पाऊस पडला. तर हवेली, मुळशी, भोर, मावळ, पुरंदर तालुक्यात ५० मिलिमीटरपेक्षा कमी पाऊस पडला आहे. त्यामुळे पेरण्या वेळेवर होऊ शकल्या नाही.

गेल्या चार ते पाच दिवसांपासून पावसाने काही प्रमाणात पडण्यास सुरुवात केली असली, तरी पूर्वेकडील शिरूर, बारामती, इंदापूर, दौड, खेड भागात पावसाने चांगलीच हुलकावणी दिली. त्यामुळे या भागात अजूनही पेरण्या झालेल्या नाहीत. काही ठिकाणी पेरण्या झाल्या असल्या तरी प्रमाण अत्यंत कमी आहे.

उत्तरेकडील जुन्नर, आंबेगाव तालुक्यात बऱ्यापैकी खरिपाच्या पेरण्या (Kharip Sowing) झाल्याचे चित्र आहे. जिल्ह्यात गेल्या वर्षी याच काळात ८० हजार ८७० हेक्टर म्हणजेच ४४ टक्के पेरण्या झाल्या होत्या. गेल्या वर्षीच्या तुलनेत चालू वर्षी पेरणीच्या क्षेत्रात चांगलीच घट झाल्याचे चित्र आहे.

जिल्ह्यात भाताचे (Paddy) सरासरी ६० हजार १०० हेक्टर क्षेत्र आहे. त्यासाठी सध्या ३ हजार ८९३ हेक्टरवर रोपवाटिका आहेत. बाजरीचे सरासरी ३७ हजार ७६० हेक्टरपैकी १ हजार ७५० हेक्टर पेरणी झाली आहे. मक्याची (Maize) २५ हजार हेक्टरपैकी ६४५ हेक्टर, मूग पिकांची १३ हजार ८०० हेक्टरपैकी १ हजार ९३८, सोयाबीनची ३७ हजार ५०० हेक्टरपैकी एक हजार ८५७ हेक्टरवर पेरणी झाली आहे. वेळेवर पाऊस न झाल्याने बहुतांशी शेतकरी सोयाबीन (Soybean) पिकांकडे वळत असल्याचे चित्र आहे.