Papaya Market : पपई प्रति किलोला सतरा रुपये दर

अॅग्रोवन वृत्तसेवा
शहादा, जि. नंदुरबार : दरवाढीबाबत पपई उत्पादक शेतकऱ्यांची मागणी लक्षात घेता शहादा कृषी उत्पन्न बाजार (Shahada APMC) समितीच्या सभागृहात खरेदीदार, व्यापारी व शेतकरी यांची बैठक झाली.

त्यात पपईला जागेवर किंवा शिवार खरेदीत १७ रुपये प्रति किलोचा दर निश्चित करण्यात आला.
शहादा तालुक्यात मोठ्या प्रमाणावर पपईचे उत्पादन (Papaya Production) घेतले जाते.

येथील पपई उत्तर प्रदेशातील व्यापारी मोठ्या प्रमाणावर खरेदी करतात. पपई दरांबाबत पाच दिवसांपूर्वी बैठक घेण्यात आली होती.

त्यात सर्वानुमते १२ रुपये ८० पैसे दर ठरविण्यात आला होता; परंतु वाढता खर्च व पपईची वाढती मागणी आणि शेतकऱ्यांमधील दरवाढीसंबंधीची मागणी लक्षात घेऊन दरवाढ करण्यात आली. व्यापाऱ्यांनीही या दरवाढीस मंजुरी दिली.

पपईची आवक घटली
उष्णता वाढत आहे. नैसर्गिक संकट शेतकऱ्यांना अडचणीत टाकणारे आहे. पपईची आवक कमी झाली आहे. कापूस व इतर शेतीमालाला भाव मिळत नसल्याने शेतकरी चिंतेत आहेत.

पपई पिकाला मिळणारा दरही कमी होता. खानदेशात १० ते १२ दिवसांपूर्वी पपईची आवक प्रति दिन ७० ट्रक (एक ट्रक १० टन क्षमता) होती.

ही आवक या आठवड्यात तब्बल ३० ट्रकनी घटली आहे. उत्तर भारतात मागणी चांगली आहे. अनेक शेतकऱ्यांनी पपई पीकही काढले आहे.

यामुळे दरवाढीची मागणी केली जात होती. दरवाढीसंबंधी आयोजित बैठकीला नंदुरबार जिल्हा फळबागायतदार शेतकरी संस्थेचे अध्यक्ष अभिजित पाटील यांसह निझर (जि. तापी, गुजरात), तळोदा, शहादा आदी भागांतील शेतकरी उपस्थित होते.