Rain Update : राज्यात पावसाची विश्रांती कायम

पुणेः राज्यातील बहुतांश भागांत पावसाची (Rain) उघडीप कायम आहे. तर काही भागांत हलक्या श्रावण सरी (Rainfall) पडत आहेत. हवामान विभागानं (Weather Department) उद्या सकाळपर्यंत कोकण आणि मध्य महाराष्ट्रातील काही जिल्ह्यांमध्ये तुरळक ठिकाणी जोरदार पावसाचा येलो अलर्ट (Heavy Rain Yellow Alert) जारी केलाय.

कोकणात पावसाचा जोर कमीच आहे. पालघर जिल्ह्यात काही मंडळात श्रावण सरी पडल्या. तर रायगड जिल्ह्यातील अनेक मंडळांत हलक्या सरी पडल्या. माथेरान, पोलादपूर आणि रोहा या मंडळांमध्ये मध्यम पाऊस झाला. रत्नागिरी आणि सिंधुदुर्ग जिल्ह्यातही हलका पाऊस झाला.

मध्य महाराष्ट्रातील नगर, धुळे, नंदूरबार आणि जळगाव जिल्ह्यांत पावसाची उघडीप कायम होती. तर कोल्हापूर जिल्ह्यात काही ठिकाणी हलक्या सरी पडल्या. गगणबावडा येथे मध्यम पाऊस झाला. नाशिक जिल्ह्यातही चार मंडळांमध्ये पावसाची भूरभूर सुरु होती. पुणे, सोलापूर आणि सांगली जिल्ह्यांत पावसानं विश्रांती दिली. तर सातारा जिल्ह्यातील महाबळेश्वर येथे ६१ मिलिमीटर पावसाची नोंद झाली.

मराठवड्यातील औरंगाबाद, बीड, हिंगोली, जालना, लातूर, उस्मानाबाद, परभणी आणि नांदेड जिल्ह्यातही बहुतांश भागांत पावसाची उघडीप होती. तर काही ठिकाणी हलक्या सरी पडल्या. विदर्भातील अकोला, बुलडाणा, चंद्रपूर आणि वाशीम जिल्ह्यात पावसानं विश्रांती दिली. तर अमरावती जिल्ह्यात काही ठिकाणी हलका पाऊस झाला. चिखलदा येथे ३९ मिलिमीटर पाऊस झाला. तर वरूड, चांदूरबाजार, मोर्शी या मंडळांमध्येही लरक्या सरी पडल्या. गडचिरोली जिल्ह्यातील भामरागड येथे ५९ मिलिमीटर पावसाची नोंद झाली. तर इतर भागांत पाऊस नव्हता. गोंदीया, वर्धा आणि यवतमाळ जिल्ह्यातही ठिकठिकाणी हलक्या सरी पडल्या.

हवामान विभागानं उद्या सकाळपर्यंत कोकणातील सिंधुदुर्ग, रायगड, ठाणे आणि पालघर तसेच मध्य महाराष्ट्रातील पुणे, सातारा, नाशिक आणि नंदूरबार जिल्ह्यात तुरळक ठिकाणी जोरदार पावसाचा अंदाज जारी केला. तर काही भागांत हलक्या सरी होतील, असा अंदाज वर्तविला.