Abdul Sattar : ‘शासन आपल्या दारी’कार्यक्रमाचे सूक्ष्म नियोजन करा

Chhatrapati Sambhaji Nagar : जिल्ह्यातील कन्नड येथे येत्या २६ मे रोजी ‘शासन आपल्या दारी’ या कार्यक्रमाचे आयोजन करण्यात आले आहे. कार्यक्रमाचे नियोजन सूक्ष्म पद्धतीने करा, अशी सूचना कृषिमंत्री अब्दुल सत्तार यांनी केले.

जिल्हाधिकारी कार्यालयात शुक्रवारी (ता. १९) ‘शासन आपल्या दारी’ कार्यक्रमाच्या आयोजनाबाबत कृषिमंत्री अब्दुल सत्तार यांनी आढावा घेतला. त्या वेळी ते बोलत होते.

बैठकीला जिल्हाधिकारी आस्तिककुमार पाण्डेय, मनपा आयुक्त जी. श्रीकांत, जिल्हा परिषदेचे मुख्य कार्यकारी अधिकारी विकास मीना, पोलिस अधीक्षक मनीष कलवानिया, निवासी उपजिल्हाधिकारी जनार्दन विधाते, जिल्हा अधीक्षक कृषी अधिकारी पी. आर. देशमुख आदी उपस्थित होते.

श्री सत्तार म्हणाले, की सर्वसामान्यांची कामे स्थानिक पातळीवर व्हावीत, त्यांना विविध योजनांचे लाभ मिळावेत, यासाठी शासन थेट जनतेच्या दारी जाणार आहे.

या अभियानाच्या माध्यमातून नागरिकांना विविध शासकीय योजनांचे लाभ एकाच ठिकाणी मिळणार आहे. मराठवाड्यासह राज्यात या कार्यक्रमाच्या यशस्वी आयोजनाचा पॅटर्न निर्माण करावयाचा आहे.

त्यासाठी प्रत्येक विभागाने थेट लाभार्थ्यांना लाभ देण्यासाठी गाव, योजना व लाभार्थीनिहाय नियोजन करावे, अशा सूचनाही त्यांनी यंत्रणेला दिल्या. नियोजन करताना गावातील लाभार्थी, सरपंच व प्रशासकीय यंत्रणेत ग्रामसेवक, तलाठी व कृषी सहायक यांच्यातील समन्वय अत्यंत महत्त्वाचा ठरणार आहे.

प्रत्येक विभागामार्फत राबविल्या जाणाऱ्या योजनांचा लाभ शेवटच्या लाभार्थ्यांपर्यंत पोहोचविण्यासाठी नियोजन करावे. अभियानांतर्गत अधिकाधिक लाभार्थ्यांना एकाच दिवशी शासकीय योजनेचा लाभ मिळवून द्यावा. अभियानाच्या माध्यमातून सर्व विभागांना एकाच छताखाली आणून गरजूंना योजनांचा लाभ मिळवून देणे या उपक्रमाद्वारे साध्य होणार आहे.

या माध्यमातून अधिकाऱ्यांना थेट नागरिकांशी संवाद साधून त्यांच्या अडचणी जाणून घेऊन तत्काळ निराकरण करणे शक्य होणार आहे. लाभार्थ्यांना कार्यक्रमाच्या ठिकाणी घेऊन येण्यासाठी गावनिहाय नियोजन करताना व्यवस्थेबाबत कोणत्याही प्रकारची अडचण येणार नाही याबाबत दक्षता घ्या, अशा सूचनाही त्यांनी दिल्या.

जिल्हाधिकारी श्री. पाण्डेय, मनपा आयुक्त जी. श्रीकांत, जिल्हा परिषदेचे मुख्य कार्यकारी अधिकारी श्री. मीना यांनीही कार्यक्रमाच्या आयोजनाबाबत माहिती दिली. या वेळी विविध विभागांच्या प्रमुख अधिकाऱ्यांनी आपल्या विभागाचे नियोजन सादर केले. या वेळी सर्व विभागप्रमुख उपस्थित होते.