Sangli DCC Bank : सांगली जिल्हा बँक कारभाराची चौकशी सुरू

सांगली ः सांगली जिल्हा मध्यवर्ती सहकारी बँकेच्या (Sangli DCC Bank) गैरव्यवहाराच्या (DCC Bank Inquiry) चौकशीवरील स्थगिती उठविल्यानंतर पाच जणांच्या समितीकडून चौकशीला सुरुवात झाली आहे. विभागीय सहनिबंधक डी. टी. छत्रीकर यांच्या पथकाने बँकेच्या अधिकाऱ्यांशी चर्चा केली.

चौकशी समितीला महिनाअखेरीस अहवाल सादर करावा लागणार आहे. संस्थांची मालमत्ता विक्री, बेकायदा कर्जवाटपासह कर्जे निर्लेखना प्रकरणांचा समावेश आहे. याबाबतची कागदपत्रे मागवल्याचे समजते.

जिल्हा बँकेमध्ये चौकशी समितीचे अध्यक्ष, विभागीय सहनिबंधक छत्रीकर यांच्यासह विशेष लेखापरीक्षक कोल्हापूर शीतल चोथे, विशेष लेखा परीक्षक सांगली संजय पाटील, विशेष लेखापरीक्षक कोल्हापूर अनिल पैलवान, द्वितीय अपर लेखापरीक्षक रघुनाथ भोसले यांनी बँकेच्या अधिकाऱ्यांशी चर्चा केली.

बँकेकडून सरफेसी कायद्यांतर्गत कर्जदार संस्थांची मालमत्ता विक्री, संस्था, कंपनी व महिला बचत गटाचे ६० कोटींचे कर्ज निर्लेखित करणे, तत्कालीन संचालकांच्या कारखान्यास ३२ कोटींचे कर्ज शिफारस नसताना देणे, महांकाली कारखान्याची कर्जवसुली न करणे, ‘स्वप्नपूर्ती शुगर्स’ला चुकीच्या पद्धतीने २३ कोटींचे कर्जवाटप, २१ तांत्रिक पदांची बनावट कागदपत्रांच्या आधारे भरतीबाबत तक्रार केली होती.