Water Shortage : मुबलक पाणी असतानाही सासवडकर तहानलेलेच

Pune News : सासवड (ता. पुरंदर) शहरास उन्हाळ्याच्या झळा बसतानाच वीज गायब होण्याच्या अवकाळी धक्क्याने पाणीटंचाईचा मोठा सामना करावा लागत आहे. त्यातून नागरिकांच्या भावना संतप्त आहेत.

सासवड शहरास नित्यदिनी वीर धरणाच्या उद्भवातून ५० ते ६० लाख लिटर पाणी उपसा सिंचन पद्धतीने दोन ठिकाणच्या पंपिंगने मिळते.

गराडे जलाशयातून रोज सायपन पद्धतीने २५ लाख लिटर पाणी मिळते. सिद्धेश्वर उद्भवातून १० लाख लिटर पाणी मिळते. घोरवडी पाटबंधारे जलाशयातून १० लाख लिटर पाणी मिळते.

शहराला दिवसाआड पाणी पुरवठा होतो. तरीही दरदिवशी ८० लाख लिटर पाणी शहराला लागते. परंतु, सिद्धेश्वर उद्भवाचे पाणी जानेवारीअखेरच पूर्णतः बंद झाले व गराडे जलाशयाचे पाणी कमी-कमी होत गेली आणि २० दिवसांपूर्वीही तेही पूर्णतः बंद झाले. आता फक्त घोरवडी जलायाचे दहा लाख लिटर पाणी गेल्या चोवीस तासात मिळाले.

वीर धरणाचे पाणी मंगळवारी (ता.९) सकाळी दहा वाजल्यापासून सलग २५ तास वीज नसल्याने व पुन्हा बुधवारी (ता. १०) दुपारी साडेतीनपासून धरणावरील वीज गेल्याने पाणी पुरवठा सुरु झालेला बंद झाला.

त्यामुळे शहरात मंगळवारपासून नळाद्वारे होणारा घरगुती, व्यावसायिक साराच पाणी पुरवठा बंद पडला आहे, असे सासवड नगरपालिकेचे पाणी पुरवठा अभियंता रामानंद कळस्कर यांनी सांगितले.

दरम्यान, उन्हाळा तीव्र असल्याने व पाणी नेमके कोणत्या दिवशी कोणत्या भागात येणार, हेसुद्धा वेळापत्रक कोलमडल्याने नागरिकांच्या भावना संतप्त आहेत.

दरम्यान, गुरुवारी (ता. ११) आगामी पालखीपूर्वी करावयाच्या वीज वितरणच्या देखभाल दुरुस्तीच्या कामासाठी जवळपास पुरंदर तालुक्यातील वीज पुरवठा सकाळी ८ ते सायंकाळी ६ दरम्यान बंद राहणार असल्याचे समजते. त्यामुळे सासवड शहराच्या विस्कळित पाणी पुरवठ्यात पुन्हा पाणी कपात होणार आहे.

त्यामुळे राहिलेल्या अति मोठ्या भागाचे पाणी पुरवठा वेळापत्रक पुन्हा पुढे जाऊ शकते, असे कळस्कर यांनी बजावले. त्यातूनच बुधवारी दिवसभर शहरात दवंडी देऊन पाणी जपून वापरा, पाणी येणार नाही किंवा पाणी येण्यास विलंब लागण्याबाबत नागरीकांना खबरदार केले.