उन्हाळी चारा पिकांची १७ हजार हेक्टरवर पेरणी

पुणे ः उन्हाळी हंगामात चारा पिकांची (Summer Fodder Crop) मोठ्या प्रमाणात पेरणी केली आहे. त्यामुळे चारा पिकांच्या क्षेत्रात (Fodder Crop Acreage) चांगलीच वाढ झाली आहे. पुणे विभागात आतापर्यंत १७ हजार १७० हेक्टरवर चारा पिके घेतली आहेत. येत्या काळात जनावरांसाठी मोठ्या प्रमाणात चारा उपलब्ध होईल. मे, जून महिन्यांत चाराटंचाई फारशी भासणार नसल्याचे चित्र आहे.

जनावरांसाठी चारा वेळेत उपलब्ध व्हावा म्हणून अनेक शेतकरी हिरव्या चाऱ्यासाठी मका, कडवळ, बाजरीची पेरणी, तर नेपिअर ग्रास, लुसर्नग्रास अशा विविध चारा पिकांची लागवड करतात. त्यामुळे जनावरांना वर्षभर पुरेल एवढा चारा टप्प्याटप्प्याने उपलब्ध होतो. या शिवाय साखर कारखान्यांचा हंगाम सुरू झाल्यानंतर अनेक शेतकरी उसाच्या वाड्याचा वापर चारा म्हणून करतात. आता गळीत हंगाम अंतिम टप्प्यात आला आहे.

मागील चार ते पाच वर्षांपूर्वी चाराटंचाईमुळे जनावरासाठी चारा छावण्या सुरू करण्याची वेळ शासनावर आली होती. त्यामुळे पुन्हा तशीच स्थिती उद्‍भवू नये, म्हणून शेतकरी पुढाकार घेत चारा पिकांचे नियोजन करत आहेत. त्यासाठी कृषी विभाग आणि जिल्हा परिषदेच्या कृषी व पशुसंवर्धन विभागाकडून शेतकऱ्यांना मका पिकांसारख्या चारा पिकांचे बियाणे देण्यात येते. यंदा नगर जिल्ह्यात सर्वाधिक चार हजार ४८१ हेक्टरवर चारा पिकांची पेरणी केली आहे. त्यानंतर पुणे जिल्ह्यात तीन हजार ४१३ हेक्टरवर, तर सोलापूर जिल्ह्यात नऊ हजार २७७ हेक्टरवर चारा पिकांची पेरणी झाली आहे.

पुणे विभागात पीकनिहाय चारा पिके (हेक्टर)

पीक --- झालेली पेरणी

मका --- ७,५२९

कडवळ --- ४,९६३

बाजरी --- ४९

लुसर्नग्रास --- ८,४४

नेपिअरग्रास --- १,७६७

इतर चारा पिके --- २,०१९

एकूण --- १७,१७१