लोहगाव, जि. औरंगाबाद : लोहगाव महसूल मंडळात रंब्बी हंगामातील (Rabbi Season) कांदा लागवडीला (Onion Cultivation) वेग आला आहे. गतवर्षी उत्पादित कांदा पिकाला अपेक्षित भाव न मिळाल्याने या वर्षी कांदा लागवडीचे क्षेत्र घटले तर गव्हाचे क्षेत्र वाढले आहे.
गतवर्षी लोहगावसह परिसरातील तोडोळी, गाढेगाव, ब्रह्मगव्हाण, मावसगव्हाण, लामगव्हाण, जोगेश्वरी वाडगाव, मुलाणीवाडगाव, शेवता, विजयपूर, तारू पिपंळवाडी ढाकेफळ, ७४ जळगाव, शेत शिवारात रब्बी कांदालागवडीसाठी दूरवरील भागातून रोपे विकत घेऊन मोठ्या प्रमाणात लागवड केली होती.
परतु एकरी आठ ते दहा हजार रुपये मजुरी, निविष्ठा रोपे, औषधी फवारणी, कांदा काढणी साठवणुकीसाठी कांदाचाळ उभारणीचा मोठ्या प्रमाणात खर्च केल्यानंतर काही महिने कांदाचाळीत साठवून ठेवलेल्या कांद्यास अपेक्षित भाव न मिळाल्याने उत्पादक शेतकरी आर्थिक अडचणीत आले. त्यानंतर खरिपातही कापूस, तूर, मूग, सोयाबीन, पिकाला सततचा व सप्टेंबर, ऑक्टोबर महिन्यात झालेल्या पावसाने शेतकरी उत्पन्नाअभावी बैचेन झाले असताना थोडेबहुत हातात आलेल्या कापसाचेही दर घसरल्याने अडचणीत सापडलेले शेतकरी रब्बी हंगामात गहू पेरणीकडे वळले आहेत.
त्यामुळे गतवर्षीपेक्षा या वर्षी कांदा लागवड क्षेत्र घटले आहे. कमी क्षेत्रावर लागवडीची लगबग संध्या परिसरात सुरू आहे.
गेल्या हंगामात खूप मोठे क्षेत्र ऊसाचे होते. तोडणी कामगार, वाहतूक यंत्रणेवर कारखाना व्यवस्थापनाचे नियंत्रण न राहिल्याने विविध साखर कारखान्यांकडे नोंद केलेल्या ऊसाची तोड करण्यासाठी उत्पादक शेतकऱ्यांची मोठ्या प्रमाणात आर्थिक पिळवणूक झाली. अनेक शेतकऱ्यांनी ऊस पीक मोडले.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
