Orange Pest : संत्र्यावर कोळी किडीचा प्रादुर्भाव

परभणी ः परभणी जिल्ह्यातील संत्रा फळपिकावर रसशोषण (Orange Sucking Pest) करणाऱ्या कोळी या किडीच्या प्रादुर्भावात वाढ होत असल्याचे आढळून येत आहे. त्यामुळे फळांचा आकार, दर्जावर परिणाम होत आहे. त्यामुळे संत्रा उत्पादक (Orange Farmer) शेतकऱ्यांना मोठा आर्थिक फटका बसणार आहे.

परभणी जिल्ह्यात परभणी, मानवत, पूर्णा या तालुक्यांमध्ये मोठ्या क्षेत्रावर संत्रा लागवड आहे. यंदाच्या मृग बहाराच्या संत्र्यावर कोळी किडीचा प्रादुर्भाव मोठ्या प्रमाणावर झाल्याचे आढळून येत आहे. जालना, औरंगाबाद जिल्ह्यांत मोठे क्षेत्र असलेल्या मोसंबीवर देखील कोळी किडींचा प्रादुर्भाव आढळून आला आहे. अन्य जिल्ह्यांतही लिंबूवर्गीय बागेमध्ये या किडीचा प्रादुर्भाव वाढू शकतो.

संत्रा, मोसंबी या लिंबूवर्गीय फळपिकांवर कोळी किडीच्या प्रादुर्भावात वाढ दिसून येत आहे. कोळी किडीचा प्रादुर्भाव वर्षभर आढळून येतो. परंतु ऑक्टोबर ते नोव्हेंबर दरम्यान जास्त असतो. या किडीमुळे फळांचे नुकसान होऊन विकृत फळे तयार होतात. ही कीड पाने तसेच फळांची साल खरवडते. रसशोषण करते.

परिणामी, पानावर पांढूरके चट्टे पडतात. फळावर तपकिरी लालसर किंवा जांभळट रंगाचे चट्टे पडतात. याला शेतकरी ‘लाल्या’ म्हणून ओळखतात. जास्त प्रादुर्भाव असल्यास फळातील फोडींची वाढ व्यवस्थित होत नाही. फळांची प्रत खालावते. त्यामुळे व्यापारी फळे खरेदी करत नाहीत. या किडीच्या व्यवस्थापनासाठी वेळोवेळी बागेची निरीक्षणे करून वेळीच उपाय करावेत. पाण्याचा ताण पडू देऊ नये.

निंबोळी अर्क (५ टक्के) किंवा ॲझाडिरेक्टीन (१० हजार पीपीएम) ३ ते ५ मि.लि. प्रति लिटर या प्रमाणे फवारणी करावी. रासायनिक नियंत्रणासाठी, फवारणी प्रति लिटर पाणी डायकोफॉल (१८.५ ईसी) २.७ मि. लि. किंवा डायफेनथीयूरोन (५० डब्ल्यूपी) २ ग्रॅम किंवा विद्राव्य गंधक ३ ग्रॅम प्रति लिटर पाण्यात मिसळून फवारणी करावी. आवश्यकता भासल्यास दुसरी फवारणी १५ दिवसांच्या अंतराने करावी, असे आवाहन कृषी कीटकशास्त्र विभाग प्रमुख डॉ. पी. एस. नेहरकर, डॉ. अनंत लाड, डॉ. योगेश मात्रे, डॉ. राजरतन खंदारे यांनी केले.