Khandesh Rain Update : खानदेशात अनेक भागांत वादळी पाऊस

Jalgaon Rain Update जळगाव ः खानदेशात मंगळवारी (ता. १४) सकाळी अनेक भागांत वादळी पाऊस (Stormy Rain) झाला. यात दादर ज्वारी, गहू, मका या पिकांची हानी (Crop Damage) झाली आहे. काही भागात हलका ते मध्यम पाऊस व सुसाट वारा अशी स्थिती होती. तर काही भागांत फक्त जोरदार (Heavy Rain Khandesh) वाऱ्यांमुळे पीकहानी झाली आहे.

मध्यंतरी ५ ते ७ मार्च या दरम्यान खानदेशात गारपीट, वादळी पाऊस झाला होता. त्यात धुळ्यातील शिंदखेडा, साक्री व शिरपूर तालुक्यांत मोठी हानी झाली होती. तसेच जळगाव जिल्ह्यातही सुमारे १३ हजार हेक्टरवर पिकांचे नुकसान झाले. आता पुन्हा रविवारी (ता.१२) ढगाळ वातावरण तयार झाले.

सोमवारीदेखील (ता.१३) वातावरण ढगाळ व पावसाळी होते. उकाडा वाढला. मध्येच ढग जमा होत होते. मंगळवारी सकाळीच अनेक भागांत सुसाट वारा व पाऊस झाला. ढगांचा गडगडाट सुरूच होता.

यात जळगाव जिल्ह्यातील चोपडा, धरणगाव, अमळनेर, एरंडोल, जळगाव या भागांत पीकहानी झाली आहे. तर धुळ्यातही शिरपूर, शिंदखेडा, धुळे, साक्री, नंदुरबारमधील तळोदा, शहादा भागांत हानी झाली आहे.

शेतकरी संकटात सापडले आहेत. ५ ते ७ मार्चदरम्यान झालेल्या नुकसानीचे पंचनामे पूर्ण होत नाहीत. तोच पुन्हा वेगवेगळ्या महसूल मंडलांत नुकसान झाले आहे. हे नुकसान किती क्षेत्रात आहे, त्याच्या टक्केवारीचा अंदाज अद्याप आलेला नाही. परंतु पिके आडवी झाल्याने मोठे नुकसान झाले आहे.

कलिंगड, खरबूज या पिकांनाही फटका बसला आहे. लहान केळीचे कुठलेही नुकसान झालेले नाही. परंतु या केळीचीही पाने फाटून तिची वाढ पुढे कमी होईल.

त्यातही नुकसान सहन करावे लागेल. सुसाट वाऱ्याने मोठ्या व लहान केळीची पाने फाटली आहेत.

यात नुकसान दिसत नसले तरी उत्पादनावर परिणाम होईल, असे शेतकरी सांगत आहेत. खानदेशात ५ ते ७ मार्चदरम्यान झालेल्या वादळात सुमारे २३ हजार हेक्टरवरील पिकांचे नुकसान झाले.

फळांची घाईघाईने विक्री

नुकसानीच्या भीतीने शेतकऱ्यांनी कलिंगड, काकडी, खरबूज व पपई पिकांची घाईघाईने रविवारी (ता.१२) व सोमवारी (ता.१३) काढणी करून घेतली. यात शेतकऱ्यांना काहीसे कमी दर मिळाले. परंतु नुकसानीच्या भीतीने शेतकरी काढणी व मळणी वेगात करून घेत आहेत. ज्वारीही अनेक भागांत कापून ठेवली आहे. त्याची पावसाने नासाडी होत आहे.