Crop Insurance : पीकविमा परताव्यासाठी ‘स्वाभिमानी’चा ठिय्या

यवतमाळ ः महागाव तालुक्‍यासह जिल्ह्यातील तब्बल ७ हजारांवर शेतकरी पीक विम्याच्या भरपाईपासून (Crop Insurance) वंचित आहेत. खरिपात झालेल्या अतिवृष्टी व संततधार पावसामुळे शेतकरी आधीच पिचला आहे. त्यात हक्‍काची विमा भरपाई (Crop Damage Compensation) मिळत नसल्याने शेतकऱ्यांच्या अडचणीत वाढ झाली आहे. याची दखल घेत विमा भरपाईची रक्‍कम खात्यात त्वरित जमा करावी, अन्यथा तीव्र आंदोलन करू, असा इशारा स्वाभिमानी शेतकरी संघटनेने दिला.

महागाव तहसीलदारांमार्फत मुख्यमंत्री एकनाथ शिंदे यांना पीकविमा भरपाई संदर्भात ‘स्वाभिमानी’ने निवेदन पाठविले. त्यासोबतच मागणीच्या पूर्ततेसाठी तहसिल कार्यालयात शेकडो शेतकऱ्यांच्या उपस्थितीत मंगळवारी (ता.१३) ठिय्या आंदोलनही करण्यात आले. खरिपाच्या सुरुवातीला पावसाने उघडीप दिली. त्यानंतर जून महिन्यापासून मात्र पाऊस थांबता थांबत नव्हता. अतिवृष्टीचा फटका बसल्याने पिकाची उत्पादकता प्रभावित झाली. शासनाने मदत जाहीर केली आणि त्याचे वितरणही झाले. परंतु हक्‍काची वीमा भरपाई मात्र शेतकऱ्यांना अद्याप मिळालेली नाही.

महागाव, पुसद, दिग्रस, उमरखेडसह जिल्हाभरात सुमारे सात हजारांवर शेतकरी भरपाईपासून वंचित आहेत. कृषी विभागाने संयुक्‍त पंचनाम्याअंती शेतकऱ्यांना भरपाई दिली असताना वेगवेगळे कारण सांगत वीमा कंपनीकडून मात्र विमा भरपाई देण्यास टाळाटाळ केली जात आहे. शेतीमालाच्या नुकसानीच्या तुलनेत अत्यल्प विमा परतावा मिळाल्याचीही बाब उघडकीस आली आहे. अशा शेतकऱ्यांना भरीव परतावा देण्याची मागणी स्वाभिमानीने केली आहे.

शेतीपंपांना १२ तास दिवसा वीजपुरवठा व्हावा, प्रोत्साहन अनुदानाची रक्‍कम खात्यात जमा करावी, अशा मागण्यांही आंदोलकांनी या वेळी केल्या. ‘स्वाभिमानी’चे जिल्हाध्यक्ष मनीष जाधव, शिवानंद राठोड, सचिन उबाळे, प्रमोद अडकीने, दीपक हाडोळे, विशाल पवार, जगदीश राठोड, विनोद पवार, शिरीष बोरुळकर, श्रीराम चव्हाण, जयसिंग राठोड आदी आंदोलनात सहभागी झाले.