अकोला ः अतिवृष्टीमुळे अकोट तालुक्यात उमरा, अकोलखेड मंडलांमध्ये खरीप पिकांचे (Kharip Crop) भवितव्य धोक्यात आले आहे. झालेल्या नुकसानीचे (Crop Damage) पंचनामे सुरू झाले आहेत. गुरुवारी (ता.१३) नुकसानग्रस्त भागात जिल्हा अधीक्षक कृषी अधिकारी आरीफ शाह (Aarif Shah) व इतर अधिकाऱ्यांनी भेट देऊन आढावा घेतला. तर दुसरीकडे तातडीने पंचनामे करून भरपाई (Crop Insurance) मिळण्याची अपेक्षा शेतकऱ्यांनी या वेळी व्यक्त केली.
अकोट तालुक्यातील बोर्डी, धारुळ रामापूर, कासोद शिवपूर, सुकळी, राहणापूर, उमरा, अकोलखेड, अकोली जहागीर, वस्तापूर, पोपटखेड, मोहाळा, लाडेगाव, जितापूर, पिंप्री, शहापूर या भागांत मॉन्सूनपूर्व लागवड झालेल्या कपाशीचे प्रचंड नुकसान झाले आहे.
खरीप हंगामात अति पावसामुळे या वर्षी उडीद व मूग पिकाने आधीच दगा दिलेला आहे. गेल्या वर्षात कापसाचा चांगला भाव मिळाल्याने या वर्षी शेतकऱ्यांनी लागवडीत दुपटीने वाढ केली. मात्र आता सातत्याने पाऊस होत असल्याने कापूस उत्पादकांची निराशा झाली आहे.
गेल्या हंगामात एकरी सात ते आठ क्विंटल उत्पादन मिळाले होते. यंदा इतकेही उत्पादन मिळण्याची शक्यता दिसत नाही. कापसाची प्रत घसरली आहे. सोयाबीन पिकाचेही सलग तिसऱ्या वर्षी नुकसान झालेले आहे.
ऐन काढणीच्या काळातच हा पाऊस होत असल्याने सोयाबीन उत्पादक हतबल झालेला दिसत आहे. या वर्षी खरीपातील प्रमुख पिके असलेल्या कपाशी आणि सोयाबीनला लावलेला खर्चाचा ताळमेळ बसणे अशक्य दिसत आहे.
वेचणीचा कापूस खराब झाला. सोयाबीन काळवंडले, कोंब निघाले. कृषी अधीक्षकांनी भेट दिली तेव्हा तालुका कृषी अधिकारी सुशांत शिंदे, कृषी सहायक बैरागी उपस्थित होते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
