Pune APMC News : पुणे बाजार समितीत चोऱ्यांचे प्रमाण वाढले

Pune APMC News : पुणे कृषी उत्पन्न बाजार समितीवर संचालक मंडळाची नियुक्ती झाल्यानंतर बाजार आवारातील प्रशासनाचा वचक कमी होण्यास सुरूवात झाली आहे. त्यामुळे चोऱ्यांचे प्रमाण वाढत आहे.

यामुळे अडते, व्यापारी आणि शेतकऱ्यांच्या शेतमालासह जीवितास धोका निर्माण झाला आहे. व्यापारी, अडते चोरांच्या भीतीमुळे तक्रार दाखल करण्यास धजावत नसल्याचे चित्र आहे.

बाजार आवारात गेल्या आठवड्यात तीन चार चोरीच्या घटना सीसीटीव्हीत कैद झाल्या आहेत. मात्र याबाबत अद्याप कोणतीही तक्रार दाखल झालेली नाही. याबाबत पोलिसांनी देखील मौन धारण केले आहे.

बाजार आवारातील फळे-भाजीपाला, गूळ भुसार बाजारात भुरट्या चोरांचा त्रास होता. मात्र आता हे चोर चोरी करण्यास घाबरत नसल्याचे चित्र आहे. बाजारातील दुकानांचे शटर तोडून चोऱ्या करण्यापर्यंत त्यांची मजल गेली आहे.

दरम्यान, बाजार आवारात गर्दुल्यांचा वावर वाढलाआहे. रात्रीच्या वेळी गाळ्यांवर गांजा, दारू पिऊन सीसीटिव्ही कॅमेरे तोडफोडीच्या घटना घडल्या आहेत. नुकतीच गूळ भुसार बाजारात नेहरू रस्त्यावरील दोन दुकाने फोडण्यात आली.

त्यापैकी एका दुकानातून सुमारे ३० हजार रुपयांची तर, भगवती ट्रेडर्स या दुकानातून सुमारे तीन लाखांची चोरी झाली. आठ दिवसांपूर्वी ज्योती पान शॉप फोडून रोख रकमेसह सुमारे ५० ते ६० हजारांचा मुद्देमाल चोरट्यांनी लंपास केला आहे. याबाबत संबंधितांनी पोलिसांत तक्रारी दिल्या आहेत.

दुसरीकडे फळे भाजीपाला बाजारात गाळ्यांवरून भाजीपाल्यासह आंबा, सफरचंदांच्या पेट्या चोरी झाल्याच्या घटना घडल्या आहेत. याशिवाय बाजारात वाहतूक कोंडी होत आहे. यामध्ये अनेक पुढाऱ्यांच्या बेशिस्त कार्यकर्त्यांच्या वाहनांचा समावेश आहे. अनेक संचालकांच्या नावे कार्यकर्ते बंदी असताना थेट वाहने बाजार आवारात आणत आहेत.

खुनाची वाट पाहणार का?

बाजार आवार हा सध्या गर्दुल्यांचा अड्डा होत आहे. बाजार आवारातील अडते, व्यापारी गर्दुल्यांना हटकण्यास घाबरतात. त्यांच्याकडून एखाद्या खुनाची घटना घडण्याची वाट संचालक मंडळ पाहतेय का? असा प्रश्‍न आडत्यांनी उपस्थित केला आहे.