Beed Onion Market News : शासनाने कांदा उत्पादकांना (Onion Producer) प्रति क्विंटल व दोनशे क्विंटलच्या मर्यादेत अनुदान जाहीर केले आहे. ते अनुदान (Onion Subsidy) शेतकऱ्यांना मिळण्यासाठी घातलेल्या दोन अटींमध्ये बदल करण्याची अपेक्षा नेकनूर येथील हेल्प इन्स्टिट्यूट फॉर नॅचरल डेव्हलपमेंट (हिंद) संस्थेने केली आहे. यासाठी मुख्यमंत्री, उपमुख्यमंत्र्यांना निवेदनही पाठविले असल्याची माहिती संस्थेचे सचिव संजय शिंदे यांनी दिली.
निवेदनानुसार शासनाने २७ मार्च २०२३ च्या निर्णयानुसार कांदा उत्पादक शेतकऱ्यांसाठी प्रती क्विंटल ३५० रुपयांप्रमाणे अनुदान देण्याचा निर्णय घेतला आहे. ही बाब अभिनंदनास्पद आहे. परंतु शासन निर्णयात लेट लाल खरीप कांदा असे उल्लेखित केले आहे.
वास्तविक काही भागांत प्रामुख्याने मराठवाड्यात लेट खरिपामध्ये व त्यानंतर जास्तीत जास्त कांदा हरणा/फुरासंगी लागवड होतो. त्यामुळे मराठवाडा आणि इतर जिल्ह्यांतील जास्तीत जास्त शेतकरी अनुदानापासून वंचित राहू शकतात. त्यामुळे यामध्ये बदल होऊन लाल व इतर वाण असा उल्लेख करावा, अशी मागणी करण्यात आली आहे.
शासन निर्णयात अटीनुसार ७/१२ उताऱ्यावर पीक पाहणी नोंद असणे असा उल्लेख केलेला आहे. वास्तविक मराठवाड्यात जवळपास ६० टक्क्यांपेक्षा जास्त शेतकऱ्यानी ई-पीक पाहाणी केलेली नाही. त्यामुळे दोन्ही मुद्दे अडचणीचे आहेत.
ही बाब लक्षात घेऊन कांदा उत्पादकांना शासनाने जाहीर केलेले अनुदान मिळावे यासाठी या दोन अटींमध्ये बदल व्हावा, अशी अपेक्षा ‘हिंद’ने थेट मुख्यमंत्री व उपमुख्यमंत्र्यांना पाठवलेल्या निवेदनातून व्यक्त केली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
