Rabi Sowing : रब्बीसाठी साडेतेरा हजार क्विंटल बियाणे वितरित

नांदेड : कृषी विभागाच्या (Agriculture Department) माध्यमातून रब्बी हंगामासाठी (Rabi Season) शेतकऱ्यांना विविध योजनेतून तेरा हजार ७५२ क्विंटल बियाणे अनुदानावर (Subsidized Seed) वाटप करण्यात आले आहेत. यात हरभरा, रब्बी ज्वारी, करडई या पिकांच्या बियाणांचा समावेश असल्याची माहिती जिल्हा अधीक्षक कृषी अधिकारी रविशंकर चलवदे यांनी दिली.

जिल्ह्यात दरवर्षी शेतकऱ्यांना खरीप तसेच रब्बी हंगामात पेरणीसाठी बियाणे अनुदानावर वाटप करण्यात येतात. यात यंदाही खरिपासह रब्बीमध्ये शेतकऱ्यांना महाडीबीडी पोर्टलसह गरजू शेतकऱ्यांना मागणीनुसार बियाणे वितरित करण्यात आले आहे.

राष्ट्रीय अन्न सुरक्षा अभियानांतर्गत रब्बीत हरभऱ्याचे दोन हजार ७८० क्विंटल प्रमाणित बियाणे वितरित केले आहे. ४१३ क्विंटल प्रात्यक्षिक घटकांतर्गत बियाण्यांचे वाटप झाले आहे. रब्बी ज्वारीत १८ क्विंटल बियाणे प्रात्यक्षिकात वितरित झाले आहे. तर पौष्टिक तृणधान्य योजनेत ६१ क्विंटल ज्वारीचे बियाणे शेतकऱ्यांना अनुदानावर देण्यात आले आहे.

ग्रामबीजोत्पादनात हरभऱ्याचे प्रमाणित बियाणे वितरित करण्यात आले आहे. यात दहा वर्षाखालील फुले विक्रम वाणाचे ३५१५ क्विंटल बियाणे वितरित केले आहे. तर दहा वर्षांवरील जॅकी ९२१८ हे हरभरा बियाणे ६८९१ क्विंटल वितरित करण्यात आले आहे.

यासोबतच राष्ट्रीय खाद्यतेल अभियानात गळीतधान्य योजनेअंतर्गत करडईचे १०४ क्विंटल बियाणे शेतकऱ्यांना अनुदानावर वितरित करण्यात आले आहे. कृषी विभागाच्या अनुदानित बियाण्यांमुळे शेतकऱ्यांचा बियाण्यांवरील खर्चात बचत झाली आहे.