Nashik News: उसाच्या शेतात आढळले बिबट्याचे तीन बछडे

Nashik Leopard News : येथील बहादूर शिवारात माजी सरपंच निवृत्ती मातेरे यांच्या उसाच्या शेतामध्ये बिबट्याचे तीन बछडे (Leopard Cub) आढळून आले. ऊसतोड (Sugarcane Harvesting) चालू असताना त्या उसाच्या क्षेत्रामध्ये (Sugarcane Acreage) साधारणपणे २५ ते ३० दिवसांचे. बिबट्याचे तीन बछडे ग्रामस्थांना आढळून आले.

चिंचखेड येथील वन्यजीव रक्षक किरण कांबळे, जीवन सतळे यांनी उसाच्या क्षेत्राजवळ जाऊन ग्रामस्थांना त्या बिबट्याच्या बछड्यांपासून दूर केले. त्या बछड्यांचे संरक्षण करून वनविभागाला पाचारण केले.

नाशिक वनविभागाचे (Forest Department Nashik) उप वनसंरक्षक उमेश वावरे, सहायक वनसंरक्षक संजय मोरे, दिंडोरी वनपरिक्षेत्र अधिकारी पूजा जोशी यांनी घटनास्थळी परिसराची व बिबट्याच्या बछड्यांची पाहणी केली.

साधारणपणे एक महिन्याचे असेल असा अंदाज उमेश वावरे यांनी सांगितले. या तीन बछड्यांजवळ सीसीटीव्ही कॅमेरे लावण्यात आले. मादी बिबट्या रात्री साडेदहाच्या दरम्यान कॅमेरात कैद झाली.

या पिलांना तिने दूध पाजले आणि आपल्या तोंडात एका पिलाला घेऊन मादी त्या ठिकाणाहून आपल्या बछड्यांना घेऊन पसार झाली.

बिबट्याच्या दहशतीमुळे शेतकरी हैराण

बऱ्याच दिवसांपासून या बिबट्याचा वावर या परिसरामध्ये असून, रात्रीच्या वेळी या बिबट्याच्या दहशतीमुळे शेतकऱ्यांना पाणी भरता येत नाही. असे भीतीचे वातावरण परिसरात आहे. चिंचखेडचे पोलिस पाटील सोनवणे यांच्या मेंढ्यांच्या कळपामधून भर दुपारी बारा वाजता बोर नाल्यातून मेंढरू ओढून नेऊन फडशा पाडला.

शेत शिवारात तर पाळीव कुत्र्यांना बिबट्या उचलून नेऊन शिकार करतो. विजेच्या लपंडावामुळे वेळापत्रकानुसार रात्री अपरात्री शेतात पाणी भरण्याचे कामे करावी लागतात. त्यात बिबट्याच्या दहशतीमुळे शेतकरी हैराण झाले आहे.

शेतमजूर दिवसासुद्धा काम करताना घाबरत असल्याने वनविभागाने लवकरात लवकर पिंजरा लावून बिबट्याला जेरबंद करावे, अशी मागणी कादवा कारखान्याचे संचालक रावसाहेब पाटील त्र्यंबकराव पाटील सुभाष मातेरे यांनी केले आहे.