कीड नियंत्रणासाठी (Pest Control) महत्त्वाचे ठरणाऱ्या ट्रायकोकार्डचे उत्पादन (Trichocard Production) , वापरास केव्हीके सेलसूराच्या वतीने प्रोत्साहन देण्यात येत आहे. त्यासाठी युवकांना प्रशिक्षण देण्यात येत असून, त्याकरिता जिल्हा प्रशासनाच्या वतीने जिल्हाधिकारी राहुल कर्डिले यांनी पुढाकार घेतला आहे.
गुलाबी बोंड अळी त्यासोबतच इतर अळीवर्गीय किडींच्या नियंत्रणासाठी ट्रायकोकर्डाचा प्रभावी वापर होतो. निसर्गात ट्रायकोग्रामा असतो.
परंतु कीटकनाशकाची फवारणी मोठ्या प्रमाणावर होत असल्याने त्याचा फारसा प्रभाव कीडनियंत्रणात होत नाही.
मात्र कृत्रिम पद्धतीने याची संख्या वाढविल्यास एकात्मिक नियंत्रण शक्‍य होते, अशी माहिती केव्हीकेचे वरिष्ठ शास्त्रज्ञ डॉ. जीवन कतोरे यांनी दिली. कापूस प्रति एकरी २ ते ४ कार्डची संख्या राहते.
एक ते दीड महिन्याच्या अंतराने ते बदलावे लागतात. कपाशीत १४ ते २० इतक्‍या संख्येने ते लागतात. एका कार्डची किंमत ७० रुपये असून, २० कार्डचा वापर केल्यास १४०० रुपयांचा खर्च होतो.
कीडनियंत्रणासाठीच्या इतर उपायांच्या तुलनेत हा उपचार स्वस्त ठरतो. त्यामुळे अशा प्रकारच्या कीडनियंत्रण पर्यायाचा वापर करण्यासाठी केव्हीकेकडून प्रोत्साहन दिले जात आहे.
जिल्हाधिकारी राहुल कर्डिले यांच्या देखील पसंतीस ही संकल्पना उतरली असून, महाराष्ट्र उद्योजकता कौशल्य विकास या योजनेअंतर्गत त्यांनी ४० प्रशिक्षणार्थ्यांना ट्रायकोकार्ड तयार करण्याचे प्रशिक्षण देण्याचा निर्णय घेतला आहे.
केव्हीकेच्या माध्यमातून हे प्रशिक्षण दिले जाणार आहे. त्याकरिता प्रत्येकी २० प्रशिक्षणार्थ्यांच्या दोन बॅचेस राहतील.
५३ दिवस याप्रमाणे दररोज सहा तास प्रशिक्षण दिले जाणार आहे. ट्रायकोकार्ड रेअरिंग हाउस उभारणे, कार्ड तयार करण्यापर्यंतच्या सर्व बाबींचा या प्रशिक्षणात समावेश राहणार असल्याची माहिती डॉ. कतोरे यांनी दिली.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
