Weather Update : राज्यात गारठा कायम

पुणे : राज्याच्या कमाल आणि किमान तापमानात चढ-उतार सुरू आहे. किमान तापमान (Minimum Temprature) २० अंशांखाली आल्याने पहाटे गारठा कायम आहे. तर दुपारी उन्हाचा चटका बसत आहे. शनिवारी (ता. २९) सकाळपर्यंतच्या २४ तासांमध्ये निफाड (Niphad) येथील गहू संशोधन केंद्रात राज्यातील नीचांकी १२.४ अंश सेल्सिअस तापमानाची नोंद झाली. आज (ता. ३०) राज्यात हवामान कोरडे राहण्याचा अंदाज हवामान विभागाने वर्तविला आहे.

नैर्ऋत्य बंगालच्या उपसागरात श्रीलंकेच्या किनाऱ्यालगत समुद्र सपाटीपासून १.५ किलोमीटर उंचीवर, तसेच विषूववृत्ताजवळील बंगालच्या उपसागरात समुद्र सपाटीपासून १.५ किलोमीटर उंचीवर चक्राकार वारे वाहत आहेत. तर ईशान्येकडील वारे सक्रिय झाल्याने शनिवारी (ता. २९) दक्षिण भारतातील राज्यांमध्ये ईशान्य मोसमी वाऱ्यांच्या (ईशान्य मॉन्सून) हंगामाला सुरुवात झाली आहे.

उत्तरेकडून वाहणारे थंड व कोरड्या वारे पोषक ठरल्याने राज्यात थंडीची चाहूल लागली आहे. तर दिवसा असलेल्या निरभ्र आकाशामुळे स्वच्छ सूर्य प्रकाश जमिनीवर येऊन उन्हाची ताप वाढली आहे. रात्री अनेक ठिकाणी दव पडत असल्याचे चित्र कायम आहे. शनिवारी (ता. २९) सकाळपर्यंतच्या २४ तासांमध्ये कोकण वगळता राज्यात बहुतांशी ठिकाणी किमान तापमान २० अंशांच्या खाली होते. तर कमाल तापमान २९ ते ३५ अंशांच्या दरम्यान स्थिरावले आहे.

शनिवारी (ता. २९) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) :
पुणे २९.८ (१३.६), जळगाव ३३.७(१६.४), कोल्हापूर ३०.६ (१७.५), महाबळेश्वर २५.२(१३.२), नाशिक २९.८ (१३.६), निफाड ३०.६ (१२.४), सांगली ३१.४(१७.१), सातारा २९.९(१५.२), सोलापूर ३२.४ (१६.६), सांताक्रूझ ३४.४(२०.४), डहाणू ३४.४ (२०.०), रत्नागिरी ३४.३ (२१.३), औरंगाबाद ३०.२ (१२.९), नांदेड ३१.२ (१७.०), उस्मानाबाद - (१६.०), परभणी ३०.७ (१५.५), अकोला ३३.२ (१८.२), अमरावती ३२.६ (१५.९), ब्रह्मपुरी ३३.३ (१७.६), बुलडाणा ३०.० (१६.६), चंद्रपूर ३१.२ (१७.४), गडचिरोली ३०.४(१६.०), गोंदिया ३०.६(१६.८), नागपूर ३२.१ (१६.६), वर्धा ३२.४(१६.४), यवतमाळ ३२.५ (१५.०).