Agriculture Export : ‘कृषी माल निर्यात संधी’वरील कार्यशाळेत शेतकऱ्यांना मार्गदर्शन

अकोला ः येथील आत्माच्या कार्यालयात ‘कृषिमाल निर्यात संधी’ (Agriculture Export) विषयावर एक दिवसाची कार्यशाळा घेण्यात आली. या वेळी नागपूर येथील निर्यातदार प्रवीण वानखडे यांनी शेतकऱ्यांना मार्गदर्शन केले.

आत्मा प्रकल्प संचालकांच्या मार्गदर्शनात ही कार्यशाळा शेतकरी उत्पादक कंपन्यांच्या प्रतिनिधींसाठी आयोजित करण्यात आली होती.

या कार्यशाळेत श्री. वानखडे यांनी आपल्याकडील शेती माल निर्यातीतील किती संधी आहेत, कुठला माल निर्यात होऊ शकतो, यासाठी पीक उत्पादन करताना काय काळजी घेतली पाहिजे अशा विविध मूलभूत बाबींसह निर्यातीच्या अनुषंगाने शेतकरी कंपन्यांना किती संधी आहे, हे सविस्तरपणे सांगितले.

कार्यशाळेला अकोला जिल्ह्यातील बार्शीटाकळी, पातूर, बाळापूर, मूर्तिजापूर, अकोला या तालुक्यांतील ४५ शेतकरी उत्पादक कंपन्यांचे प्रतिनिधी, प्रगतिशील शेतकरी, उद्योजकांची उपस्थिती होती. शेतकरी प्रतिनिधींनी उपस्थित केलेल्या प्रश्‍नांचे समाधान करण्यात आले.