चांगली प्रतिकारशक्ती कोरोनावर करते मात; ऑस्ट्रेलियातील अभ्यासकांचे संशोधन

मेलबर्न : कोरोनाव्हायरसच्या वाढत्या संसर्गाच्या पार्श्वभूमीवर ऑस्ट्रेलियातील संशोधकांकडे एक चांगली बातमी आहे. ऑस्ट्रेलियातील कोरोनाच्या पहिल्या रुग्णाच्या शरिरातील प्रतिकारशक्तीने या संसर्गाचा कशा प्रकारे मुकाबला केला याचा अभ्यास संशोधकांनी केला आहे. मानवी शरिरातील प्रतिकारशक्ती या विषाणूचा प्रतिकार करण्यास सक्षम असल्याचे संशोधकांना आढळून आले आहे. तसेच, चांगली प्रतिकारशक्ती असेल तर रुग्ण तीन दिवसांत बरा होऊ शकतो, अशी नवी माहिती या अभ्यासातून पुढे आली आहे. कोरोना विषाणूच्या संसर्गाने जगभरात कहर केला आहे. त्यामुळे या विषाणूवर औषध शोधण्यासाठी अनेक देशांमधील संशोधकांचे प्रयत्न सुरू आहेत. अशाच प्रयत्नांचा एक भाग म्हणून ऑस्ट्रेलियातील पीटर डोहेर्टी इंस्टिट्यूट फॉर इन्फेक्शन ऑंड इम्युनिटी या संस्थेतील संशोधकांनी ऑस्ट्रेलियातील कोरोनाच्या रुग्णाचा अभ्यास केला. मेलबर्न विद्यापीठ आणि रॉयल मेलबर्न रुग्णालय यांच्या संयुक्त प्रयत्नांतून हे संशोधन करण्यात आले. ऑस्ट्रेलियातील पहिल्या रुग्णाला कोरोनाची बाधा झाल्यानंतर या विषाणूच्या संसर्गाला रुग्णाच्या शरिरातील प्रतिकारशक्ती कशा प्रकारे प्रतिसाद देते याचा अभ्यास संशोधकांनी केला. निरोगी असलेल्या ४० वर्षांच्या महिलेत कोरोनाची अल्प ते मध्यम स्वरुपाची लक्षणे आढळून आल्यानंतर तिला रुग्णालयात दाखल करण्यात आले होते. या रुग्णाच्या रक्ताचे चार वेगवेगळ्या वेळी नमूने घेण्यात आले. रुग्णालयात दाखल केल्यानंतर तीन दिवसांनी दिसून आले की रुग्णाच्या शरिरातील प्रतिकारक्षम पेशींची संख्या प्रचंड प्रमाणात वाढली होती. शीतज्वर झालेल्या रुग्णाच्या शरिरातही अशाच प्रकारची प्रक्रिया घडून येते. सामान्यपणे हे रुग्ण बरा होण्याचे लक्षण मानले जाते. ही माहिती प्राप्त झाल्यानंतर संबंधित रुग्ण तीन दिवसांत बरा होईल अशी शक्यता आम्ही वर्तविली होती, जी संबंधित रुग्णाच्या बाबत खरी ठरल्याचे दिसून आले, अशी माहिती डॉ. ओआन्ह न्युयेन यांनी दिली. कोरोनाच्या विरोधातील लस शोधण्यासाठी संशोधकांना या अभ्यासाची मोलाची मदत होणार आहे. मृत्यूचे कोडे उलगडणार?