लाखेगावात शंभर कुटुंबांत परसबाग, पोषणमूल्य आधारित शेती

औरंगाबाद : पैठण रस्त्यावरील कृषी विज्ञान केंद्रातर्फे पोषण परसबाग व पोषणमूल्य आधारित शेतीपद्धती प्रकल्प लाखेगाव येथील १०० कुटुंबांत राबविण्यात येणार आहे. नारी व युनिसेफअंतर्गत प्रायोगिक तत्त्वावर होणाऱ्या या प्रकल्पाअंतर्गत परसबाग व पोषणमूल्य आधारित शेती केली जाणार आहे. त्यासाठी जुलै महिन्यात प्रशिक्षण देण्यात आले आहे, अशी माहिती कृषी विज्ञान केंद्रातर्फे देण्यात आली.

‘‘लाखेगाव येथील १०० कुटुंबांना ज्वारी (शक्ती-लोहयुक्त वाण) लोहयुक्त बाजरी, राडा, भगर, राजगीर शेवगा, लिंबू व १८ प्रकारचे विविध भाजीपाल्याचे बियाणे देण्यात आले. अटारी पुणे, महाराष्ट्र कृषी शिक्षण संशोधन परिषद, पुणे यांच्या सहयोगाने एम. एस. स्वामिनाथन रिसर्च फाउंडेशनच्या तांत्रिक मार्गदर्शनाखाली युनिसेफच्या अर्थसाहाय्याने हा प्रकल्प राबविण्यात येत आहे. त्याद्वारे विषमुक्त अन्न व भाजीपाल्याची निर्मिती होईल,’’ असे ‘केव्हीके’च्या शास्त्रज्ञ डॉ. अनिता जिंतुरकर यांनी सांगितले. 

‘केव्हीके’च्या प्रमुख प्रा. दीप्ती पाडगावकर म्हणाल्या, ‘‘ग्रामीण भागात सर्व लोक हे शेतीशी निगडित आहेत; परंतु त्यांच्या कष्टाच्या मानाने आहारात पोषक घटकांची कमतरता अधिक आहे. लहान मुले व महिलांच्या बाबतीत हे प्रमाण दुप्पट आहे. त्यामुळे अनेक आरोग्यविषयक तक्रारी निर्माण झाल्याचे आढळून येत आहे.’’ 

‘‘सेंद्रिय पद्धतीने पोषण परसबाग संकल्पना ग्रामीण भागात रुजावी, आरोग्यसाठी भाजीपाला व अन्यधान्य शेतकरी कुटुंबांत उपलब्ध व्हावे, या उद्देशाने हा प्रकल्प राबविण्यात येत आहे,’’ असेही पाडगावकर यांनी सांगितले. इरफान शेख, सरपंच अंकुश रहाटवडे, निवृत्ती कागदे आदींचा विशेष सहयोग लाभला.