‘बाधित कुक्कुटपालकांना नुकसानभरपाई मिळणार’

परभणी ः ‘‘‘बर्ड फ्लू’मुळे मुरुंबा (ता. परभणी) येथील एका कुक्कुटपालन फार्मवरील ८४३ कोंबड्या मृत्यमुखी पडल्याचे निष्पन्न झाले. त्यानंतर बुधवारी (ता. १३) पशुसंवर्धन विभागाच्या पथकाने मुरुंबा शिवारातील तीन शेतकऱ्यांच्या कुक्कुटपालन फार्मवरील ३ हजार ४४३ कोंबड्यांना शास्त्रोक्त पद्धतीने दयामरण (कलिंग) देऊन विल्हेवाट लावली. कुक्कुटपालक शेतकऱ्यांना शासनाच्या नियमानुसार नुकसानभरपाई मावेजा अदा केला जाईल,’’ अशी माहिती पशुसंवर्धन उपायुक्त डॉ. अशोक लोणे यांनी दिली.

‘बर्ड फ्लू’ चा प्रसार रोखण्यासाठी पशुसंवर्धन विभागाने मुरुंबा तसेच गावाच्या पाच किलोमीटर परिघातील कोबंड्याच्या वाहतूक, विक्री खरेदीच्या व्यवहारास प्रतिबंध घातला होता. औरंगाबाद विभागाचे प्रादेशिक पशुसंवर्धन सहआयुक्त डॉ. एस. जे. गायकवाड हे परिस्थितीवर लक्ष ठेऊन होते.

मुरुंबा येथील बाधित क्षेत्रातील एक किलोमीटर परिसरात कुक्कुट पक्षांना दयामरण देऊन शास्त्रोक्त पद्धतीने विल्हेवाट लावण्यासाठी आठ शीघ्र कृतिदलाची स्थापना करण्यात आली आहे. 

बाधित क्षेत्रातील पक्षांच्या संपर्कात आलेल्या व्यक्तींनी दुसऱ्या प्रक्षेत्रावर जाऊ नये, प्रक्षेत्रावर वावरताना मास्क, सॅनिटायझर, गमबुट, हँडग्लोज व चष्मा वापरून वैयक्तिक सुरक्षेचे पालन करावे. तरी जिल्ह्यामध्ये स्थलांतरित पक्षी, कावळे, कुक्कुट वर्गीय पक्ष्यांमध्ये असाधारण मृत्यू झाल्याचे आढळून आल्यास (०२४५२) २२०३८८ या दूरध्वनी क्रमांकावर किंवा नजीकच्या पशुवैद्यकीय दवाखान्याची संपर्क साधावा. नागरिकांनी अफवांवर विश्वास ठेवू नये, असे आवाहन डॉ. लोणे  यांनी केले.