पुणे : रोजगार हमी योजनेतून शेततळे खोदण्यासाठी उपलब्ध असलेल्या अनुदान योजनेतून आता प्लॅस्टिक अस्तरीकरणाचा समावेश करण्यात आला आहे. महात्मा गांधी राष्ट्रीय ग्रामीण रोजगार हमी योजनेतून मजुरांद्वारे शेततळे खोदता येते. त्यासाठी मजुरीचा दर २३८ रुपये आहे. इनलेट व आऊटलेट विरहित मजुरांद्वारे होणाऱ्या खोदाईचे आर्थिक मापदंड बघता ३० मीटर लांबी x ३० मीटर रुंदी x ३ मीटर खोलीच्या शेततळ्यासाठी एकूण रक्कम ५,६८,३८० रुपये उपयोजना डोंगरी भागासाठी गृहीत धरण्यात आली आहेत. तसेच इतर क्षेत्रासाठी ही रक्कम ५,१४,८९५ रुपये अपेक्षित आहे.
रोजगार हमी योजनेच्या अपर मुख्य सचिवांनी जारी केलेल्या आदेशानुसार शेततळ्यात आता अस्तरीकरणाचा भाग देखील समाविष्ट करण्यात आला आहे. अर्थात, त्यासाठी निकष मात्र कृषी विभागाने निश्चित केलेल्या नियमावलीतील वापरले जातील. रोजगार हमी विभागाच्या या निर्णयामुळे अस्तरीकरणाच्या कामांबाबत होत असलेल्या खर्चाच्या बाबी कशा व कोणत्या पद्धतीने बसवायच्या या विषयीचा संभ्रम दूर झाला आहे, अशी माहिती कृषी विभागाच्या सूत्रांनी दिली.
‘लॅमिफॅब्जस् अॅन्ड पेपर प्रायव्हेट लिमिटेड कंपनी’चे विपणन व्यवस्थापक अंगध होळंबे म्हणाले, ‘‘रोहयोमध्ये शेतकरी आधी स्वःखर्चातून अस्तरीकरण करीत होते. मात्र, आता राज्य शासनाने अस्तरीकरणाचा समावेश केल्यामुळे शेतकऱ्यांची मोठी गैरसोय दूर होईल. प्लॅस्टिक पेपर टाकल्यामुळे पाणीसाठा जास्त काळ उपलब्ध होतो. उत्पादन व उत्पादकता वाढीसाठी अस्तरीकरणाची बाब महत्त्वाची समजली जाते.’’
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.