दहावीचा भूगोलचा पेपर पुढे ढकलला

मुंबई: कोरोनाचा वाढता प्रादुर्भाव पाहता दहावीचा शेवटचा पेपर पुढे ढकलण्यात आला आहे. २३ मार्चला होणारा भूगोल विषयाचा पेपर आता ३१ मार्चनंतर होणार आहे. शालेय शिक्षणमंत्री वर्षा गायकवाड यांनी याबाबतचा निर्णय जाहीर केला आहे.  दहावी बोर्डाचा शेवटचा पेपर राहिला आहे. महाराष्ट्र राज्य माध्यमिक आणि उच्च माध्यमिक शिक्षण मंडळाकडून घेण्यात येणाऱ्या दहावीच्या परीक्षेला ३ मार्चपासून सुरुवात झाली आहे. ३ मार्च ते २३ मार्च २०२० या कालावधीत ही परीक्षा नियोजित होती. मात्र राज्यात कोरोनाचे थैमान पाहता, शेवटचा पेपर लांबणीवर टाकण्यात आला आहे. इयत्ता १० वी परीक्षेचा सोमवारी (ता. २३) होणारा पेपर पुढे ढकलण्यात आला आहे. या पेपरची पुढील तारीख ३१ मार्चनंतर जाहीर करण्यात येईल, असे मंत्री वर्षा गायकवाड यांनी सांगितले आहे. नियोजित वेळापत्रकानुसार, दहावी बोर्डाचा भूगोल विषयाचा पेपर २३ मार्चला होता. मात्र सध्याची परिस्थिती पाहता, हा पेपर ३१ मार्चनंतर घेण्यात येईल, असे वर्षा गायकवाड म्हणाल्या आहेत. यंदा राज्यभरातून १७ लाख ६५ हजार ८९८ विद्यार्थी दहावीची परीक्षा देत आहेत. यात ९ लाख ७५ हजार ८९४ विद्यार्थी, तर ७ लाख ८९ हजार ८९८ विद्यार्थिनींचा समावेश आहे. गेल्या वर्षीच्या तुलनेत यंदा ६५ हजार परीक्षार्थी वाढले आहेत.  राज्याच्या शालेय शिक्षण मंत्री वर्षा गायकवाड यांनी पहिली ते आठवीपर्यंतच्या सर्व परीक्षा रद्द करण्याची घोषणा केली. तर नववी आणि अकरावीच्या परीक्षा १५ एप्रिलनंतर होणार आहेत. वर्षा गायकवाड यांनी शुक्रवारी हा निर्णय जाहीर केला होता. कोणकोणत्या परीक्षा रद्द अथवा पुढे ढकलल्या?