गोंदिया जिल्ह्यातील धान उत्पादकांचे १०० कोटी थकले 

गोंदिया ः मार्केटिंग फेडरेशनच्या केंद्रावर धान विक्री करणाऱ्या जिल्ह्यातील तब्बल १५ हजारावर शेतकऱ्यांचे १०० कोटी रुपयांचे चुकारे थकले आहेत. ऐन खरिपाच्या तोंडावर ही आर्थिक कोंडी झाल्याने ही समस्या सोडविण्याची मागणी होत आहे. 

धानाकरिता केंद्र सरकारने १८३५ रुपयांचा हमीभाव जाहीर केला होता. त्यानंतर राज्य सरकारने ५०० रुपये बोनस व त्यानंतर २०० रुपये सानुग्रह अनुदान जाहीर केले. याप्रमाणे धानाचे दर २५०० रुपये क्‍विंटलवर पोचले. परिणामी शेतकऱ्यांनी आपल्याकडील बहुतांशी धान शासकीय केंद्राला विकले. जिल्ह्यात खरीप हंगामात ७० शासकीय धान केंद्र होते. त्यांच्या माध्यमातून ३१ मार्चपर्यंत ३५ लाख क्‍विंटल धानाची खरेदी करण्यात आली. 

या धानाची किंमत ६०० कोटी इतकी होती. यापैकी ५०० कोटी रुपयांचे चुकारे करण्यात आले आहेत. मात्र, मार्च महिन्यात कोरोनाचा प्रादुर्भाव वाढीस लागल्याने सर्व व्यवहार ठप्प झाले. शासनाकडून निधी मिळण्यास अडचण निर्माण झाली. परिणामी १५ हजार शेतकऱ्यांचे १०० कोटी रुपयांचे चुकार थकले आहेत. चुकाऱ्याची रक्‍कम थेट खात्यात जमा होत असल्याने शेतकरी हे पाहण्यासाठी बॅंकेच्या पायऱ्या झिजवीत आहेत. मात्र प्रत्येकवेळी त्यांना निराश होऊनच परतावे लागते. खरीप हंगाम अवघ्या महिनाभरावर असल्याने शेतकऱ्यांना पैशाची गरज आहे. त्यामुळे हे चुकारे करण्यात यावे, अशी मागणी होत आहे. 

रब्बीचे १५ लाख क्‍विंटल धान खरेदीचा अंदाज  जिल्ह्यात रब्बी हंगामात ३५ हजार हेक्‍टरवर धानाची लागवड करण्यात आली. सध्या त्याची कापणी, मळणी सुरू आहे. या धानाच्या खरेदीकरिता ७० केंद्र प्रस्तावित आहेत. त्या माध्यमातून १५ लाख क्‍विंटल धान खरेदीचा अंदाज आहे.