देशात ९६ टक्के पाऊस; एल निनो सौम्य स्थितीत (सविस्तर अंदाज)

देशात ९६ टक्के पाऊस; एल निनो सौम्य स्थितीत  (सविस्तर अंदाज)
देशात ९६ टक्के पाऊस; एल निनो सौम्य स्थितीत (सविस्तर अंदाज)

पुणे : नैॡत्य मोसमी वाऱ्यांच्या (मॉन्सून) हंगामाचा सुधारित दीर्घकालीन अंदाज हवामान विभागाने शुक्रवारी (ता. ३१) जाहीर केला आहे. त्यानुसार देशभरात यंदा सर्वसाधारण म्हणजेच ९६ टक्के पावसाचा अंदाज आहे. तर महाराष्ट्रासह मध्य भारतात १०० टक्के पाऊस पडण्याची शक्यता वर्तविण्यात आली आहे.  दीर्घकालीन सरासरीनुसार ९६ ते १०४ टक्के पाऊस सर्वसाधारण मानला जातो. १९५१ ते २००० कालावधीत देशाची मॉन्सून पावसाची सरासरी ८९ सेंटिमीटर म्हणजेच ८९० मिलिमीटर आहे. सुधारित पूर्वानुमानानुसार देशात ९६ टक्के पाऊस पडणार असून, अदांजात चार टक्के कमी-अधिक तफावत गृहीत धरण्यात आली आहे. हवामान विभागाने १५ एप्रिल रोजी वर्तविलेल्या प्राथमिक अंदाजातही देशात ९६ टक्के पाऊस पडण्याची शक्यता वर्तविली होती.    विभागनिहाय पावसाच्या अंदाजाचा विचार करता वायव्य भारतात ९४ टक्के, मध्य भारतात १०० टक्के, दक्षिण भारतात ९९ टक्के तर पूर्व व ईशान्य भारतात ९१ टक्के पावसाची शक्यता आहे. यात आठ टक्के कमी-अधिक तफावत गृहीत धरण्यात आली आहे. तर जुलै महिन्यात सरासरीच्या ९५ टक्के, तर एप्रिल महिन्यात ९९ टक्के पावसाची शक्यता वर्तविली आहे. या अंदाजातही ९ टक्के कमी अधिक तफावत होऊ शकते असे हवामान विभागाने म्हटले आहे. जुलै महिन्याच्या अखेरीस हवामानाच्या दुसऱ्या टप्प्याचा (ऑगस्ट ते सप्टेंबर) अंदाज वर्तविण्यात येणार आहे.  

मॉन्सून मिशन मॉडेलनुसार ९७ टक्के पाऊस आयएमडीच्या डायनानिकल कपल्ड ओशन-ॲटमॉस्फिअर ग्लोबल क्लायमेट फोरकास्टिंग सिस्टिमच्या (सीएफएस) सुधारित अंदाजानुसार देशात ९७ टक्के पावसाची शक्यता आहे. या अंदाजतही ४ टक्क्यांची कमी अधिक तफावत गृहीत धरण्यात आली आहे. पहिल्या टप्प्यात या मॉडेलनुसार देशात ९४ टक्के पावसाची शक्यता वर्तविण्यात आली होती.  एल निनो सौम्य स्थितीत प्रशांत महासागराच्या विषुववृत्तीय भागात सौम्य एल निनाे स्थिती आहे. मॉन्सून हंगामात ही स्थिती कायम राहणार असली, तरी तीव्रता कमी होण्याचे संकेत आहेत. तर काही हवामान मॉडेल्सनुसार शेवटच्या टप्प्यात एल निनो निवळून जाऊन सर्वसाधारण स्थिती निर्माण होण्याची शक्यता आहे.  मॉन्सूनच्या पावसाची शक्‍यता 

प्रमाण (टक्के) शक्‍यता
९० पेक्षा कमी १५ टक्के
९० ते ९६ ३२ टक्के
९६ ते १०४   ४१ टक्के
१०४ ते ११० १० टक्के
११० हून अधिक ०२ टक्के

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com