खानदेशात केळीला ११८० रुपये दर

खानदेशात केळीचे दर कमी अधिक होत आहेत. मध्य प्रदेशातील केळीसाठी प्रसिद्ध असलेल्या बऱ्हाणपूर येथील बाजारात सोमवारी (ता. १८) केळीला १२२० रुपये प्रतिक्विंटलचा दर मिळाला.
1180 per banana in Khandesh
1180 per banana in Khandesh

जळगाव ः खानदेशात केळीचे दर कमी अधिक होत आहेत. मध्य प्रदेशातील केळीसाठी प्रसिद्ध असलेल्या बऱ्हाणपूर येथील बाजारात सोमवारी (ता. १८) केळीला १२२० रुपये प्रतिक्विंटलचा दर मिळाला. जळगाव, धुळ्यातही दर्जेदार केळीच्या दरात क्विंटलमागे १० ते २० रुपयांची घसरण झाली असून, कमाल दर ११८० रुपये प्रतिक्विंटल एवढा झाला आहे. 

किमान दर ६०० ते ६५० रुपये प्रतिक्विंटल एवढा आहे. सणासुदीसह कमी आवकेमुळे केळीला यंदा चांगले दर मिळाले. उत्तरेकडील म्हणजेच पंजाब, काश्मीर, दिल्ली, हरियाना, उत्तर प्रदेश, राजस्थानमध्ये केळीला मोठा उठाव आहे. राज्यातही सणासुदीसह इतर फळांची आवक बाजारात कमी असल्याने केळीला उठाव आहे. पण केळीची आवक गेल्या १० दिवसांत वाढली आहे.  

रावेर, मुक्ताईनगर भागातही आगाप लागवडीच्या नवती बागांमध्ये काढणी सुरू झाली आहे. कमी दर्जाच्या केळीला खानदेशात मध्यंतरी ७०० रुपये प्रतिक्विंटलचा दर होता. पण सध्या ६०० ते ६५० रुपये दर आहे. मध्य प्रदेशात कमी दर्जाच्या केळीला किमान ७०० रुपये प्रतिक्विंटलचा दर आहे. जळगाव, धुळ्यातून उत्तरेकडे बॉक्समध्ये पॅकिंग करून केळीची पाठवणूक सुरू आहे. उत्तरेकडील मॉल, आठवडी बाजार सुरू आहेत. 

शिवाय दिल्ली येथील आझादपूर बाजारातही केळीला मागणी आहे. या भागातील मोठे खरेदीदार यावलमधील फैजपूर, रावेरातील सावदा, चोपडा आदी भागातील एजंटच्या मदतीने केळीची खरेदी करून घेत आहेत. केळीची आवक जळगाव, धुळ्यात गेल्या १० ते १५ दिवसांत २५ ट्रकने (एक ट्रक १५ टन क्षमता) वाढली असून, एकूण २२० ट्रकपेक्षा अधिक आवक जळगाव, धुळ्यात मिळून होत आहे. राज्यातून मागणी काहीशी कमी झाली आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com