निर्यातीच्या केळीला १३०० रुपये दर 

जळगाव ः खानदेशातून आखातात किंवा परदेशात केळी निर्यातीला या महिन्यात सुरुवात झाली आहे. सध्या रोज सहा कंटेनर (एक कंटेनर २० टन क्षमता) केळीची निर्यात सुरू आहे. या निर्यातीच्या केळीला किमान १३०० रुपये प्रतिक्विंटलचा दर जागेवर मिळत आहे.  केळी निर्यातीच्या कार्यवाहीसाठी काही बड्या कंपन्या खानदेशात केळीची खरेदी करीत आहेत. या कंपन्यांनी पश्‍चिम बंगालमधील सुमारे साडेचार हजार मजूर केळी पॅकिंग, काढणीच्या कार्यवाहीसाठी उपलब्ध केले आहेत. गेल्या वर्षी लॉकडाउनमुळे केळी निर्यातीला फटका बसला. कारण कुशल मजूर उपलब्ध होत नव्हते. तसेच वाहतुकीसंबंधीदेखील अडचणी होत्या, निर्यात रखडत सुरू होती. यंदा खानदेशातून सुमारे १२०० कंटेनर आखातात निर्यात होण्याची अपेक्षा आहे. सध्या रोज आठ कंटेनर केळीची निर्यात होत आहे. यात एक कंटेनर रोज शहादा तालुक्यातून एका कंपनीच्या मदतीने आखातात पाठविले जात आहे. तर जळगाव जिल्ह्यातून रोज सात कंटेनर केळीची निर्यात आखातात होत आहे. सावदा (ता. रावेर), तांदलवाडी (ता. रावेर) येथील केळी पॅकहाउसची मदत केळी निर्यातदार कंपन्यांना केळी पॅकिंग व इतर कार्यवाहीसाठी होत आहे. निर्यातीच्या केळीला १३०० ते १३७५ रुपये प्रतिक्विंटलचा दर मिळत आहे. रावेरात अधिकची निर्यातक्षम केळी उपलब्ध होत आहे.  उठाव वाढला  खानदेशात १२ केळी खरेदीदार कंपन्या खरेदी करीत आहेत. यामुळे केळी दरांवरील दबाव दूर झाला आहे. दिल्ली, पंजाब, काश्मीर आदी भागांतूनही खानदेशातील केळीला उठाव आहे. केळीचे किमान दर खानदेशात ८०० रुपये प्रतिक्विंटल आहेत, अशी माहिती मिळाली.