खानदेशात कर्जमुक्तीची १३ हजारांवर शेतकऱ्यांना प्रतीक्षा

जळगाव ः खानदेशात सुमारे १३ हजार शेतकऱ्यांना महात्मा फुले कर्जमुक्ती योजनेचा लाभ मिळालेला नाही. यातील अनेक शेतकऱ्यांना राज्य शासनाकडून अपलोड झालेली माहिती ग्राह्य न धरली गेल्याने या योजनेपासून वंचित राहावे लागले आहे. 

खानदेशात सुमारे दोन लाख शेतकऱ्यांना या योजनेचा लाभ मिळाला. नंतर कोरोना व इतर संकटे आली. या योजनेची कार्यवाही संथ झाली. निधीची अडचण, तांत्रिक अडचण आदी कारणे बँका शेतकऱ्यांना सांगत आहेत. कर्जाची, पात्र असल्याची माहिती संबंधित पोर्टलवर अपलोड केली आहे. परंतु ती स्वीकारली जात नसल्याने कर्जमुक्ती योजनेचा लाभ मिळत नसल्याचे बँकांचे म्हणणे आहे. 

अपलोड केलेली माहिती राज्य शासनाच्या संबंधित यंत्रणेकडून स्वीकारली जाते. त्यानंतर शासनाकडून संबंधित कर्जदार शेतकऱ्याच्या बँक खात्यांत कर्जाचा निधी जमा केला जातो. यानंतर संबंधित शेतकरी कर्जमुक्त होतो. जळगाव जिल्ह्यात सुमारे सात हजार व धुळे, नंदुरबारात सुमारे सहा हजार शेतकरी या योजनेपासून वंचित आहेत. 

नियमित कर्जदारही अनुदानासापून वंचित 

सुमारे एक लाख नियमित कर्जदार शेतकरी ५० हजार रुपये प्रोत्साहन अनुदानापासून वंचित आहेत. यामुळे शेतकऱ्यांमध्ये रोष आहे. जे शेतकरी पात्र असून, यादीत नाव असूनही, काही कारणांनी कर्जमुक्त झालेले नाहीत, त्यांना नव्याने पीककर्ज मिळत नसल्याची स्थिती आहे. बँकाही कर्जमुक्तीचे पत्र (बेबाकी दाखला) देत नाहीत. यामुळे संबंधित शेतकऱ्यांची अधिकची अडचण होत आहे.