प्रत्येक शेतीशाळेवर १४ हजार खर्च; थेट बांधावर जाऊन शेतकऱ्यांना मार्गदर्शन

शेतीशाळा
शेतीशाळा

पुणे : शेतकऱ्यांना थेट बांधावर जाऊन जादा पीक उत्पादनाची माहिती देणाऱ्या शेतीशाळांना राज्यभर धडाक्यात सुरवात झाली आहे. विशेष म्हणजे प्रत्येक शेतीशाळेवर १४ हजार रुपये खर्च केले जाणार आहेत. शेतीशाळेसाठी राष्ट्रीय अन्न सुरक्षा अभियान, गळीत धान्य अभियान, राष्ट्रीय कृषी विकास योजना आणि आत्मामधून निधी उपलब्ध करून दिला जाणार आहे. त्यानंतरदेखील निधी कमी पडल्यास क्रॉपसॅपमधून निधी मिळणार आहे. क्रॉपसॅप संलग्न शेतीशाळेसाठी प्रशिक्षण साहित्याकरिता प्रतिशेतकरी दोनशे रुपये या प्रमाणे पाच हजारांपर्यंत खर्च केला जाईल. शेतकरी अल्पोपहारासाठी पाच हजारांपर्यंत, शेतकरीदिनासाठी दोन हजार तर अहवाल तयार करण्यासाठी दोन हजार रुपये असे एकूण १४ हजार रुपये एका शाळेवर खर्च केले जातील.  राज्यात सोयाबीनच्या ६३३ शेतीशाळा घेतल्या जाणार आहेत. आत्मामधून मात्र दोन हजार २०० शेतीशाळा होतील. त्यासाठी तीन कोटी रुपयांच्या आसपास खर्च होण्याची शक्यता आहे. नाशिक विभागात २५०, पुणे २३४, कोल्हापूर २१३, औरंगाबाद १७८, लातूर ३०५, अमरावती ३३६ तर नागपूर विभागात सर्वात जास्त म्हणजे ४०६ शेतीशाळा आत्मामधून घेतल्या जाणार आहेत.  कृषी सहायकाकडून क्रॉपसॅपमध्ये निवडलेल्या गावांमध्ये एका प्रमुख पिकासाठी निवडलेल्या प्लॉटवर शेतीशाळा घेतली जाईल. महिला कर्मचाऱ्यांना मात्र जास्तीत जास्त महिला शेतकरी वर्गाला प्राधान्य देत महिला शेतीशाळा घेण्याच्या सूचना देण्यात आलेल्या आहेत. 

एमक्रॉपसॅप किंवा इतर ॲप्लिकेशनद्वारे शेतीशाळा प्रशिक्षण वर्गाचे प्रत्यक्ष ठिकाण, वेळ व अहवालाची नोंदणी केली जाणार आहे. कृषी सहायक व पर्यवेक्षकांवर ही जबाबदारी असेल. मंडळ कृषी अधिकाऱ्यांना या शेतीशाळांमध्ये मार्गदर्शन करावे लागेल. याशिवाय त्यांना एमक्रॉपसॅपमध्ये शेतीशाळेला भेट दिल्याच्या प्रत्यक्ष ठिकाणाचा फोटो, वेळ, अहवाल नोंदणी करावी लागणार आहे.  १५ दिवसांनी प्रशिक्षण वर्ग प्रमुख पिकाची निवड करताना खरीप हंगामात एकूण पेरणी होणाऱ्या क्षेत्रापैकी ७० टक्के पेरा होणाऱ्या पिकाला प्राधान्य मिळणार आहे. पीकवाढीच्या अवस्थेनुसार दर १५ दिवासांनी प्रशिक्षण वर्ग होतील. शेतीशाळेत किमान २५ शेतकरी ठेवले जातील. या शेतकऱ्यांना प्रात्यक्षिकांचा तसेच केंद्र व राज्य पुरस्कृत योजनांचा लाभ देतांना प्राधान्य मिळणार आहे.   

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com