बीड, उस्मानाबाद जिल्ह्यांत चारा छावण्यांत २ लाखांवर जनावरे

औरंगाबाद : मराठवाड्यातील बीड व उस्मानाबाद जिल्ह्यात यंदा २२ मार्चअखेरपर्यंत ३७३ चारा छावण्या सुरू करण्यात आल्या. या चारा छावण्यांमध्ये जवळपास २ लाख ८ हजार ३५२ लहान, मोठी जनावरे आश्रयास असल्याची माहिती प्रशासनाच्या सूत्रांनी दिली. 

मराठवाड्यात २२ मार्चपर्यंत ८२० चारा छावण्यांना मंजुरी मिळाली आहे. त्यामध्ये बीड जिल्ह्यातील ७८२ व उस्मानाबाद जिल्ह्यातील ३८ चारा छावण्यांचा समावेश आहे. मंजूर छावण्यांपैकी ३७३ चारा छावण्या प्रत्यक्षात सुरू झाल्या आहेत. सुरू झालेल्या चारा छावण्यांमध्ये बीड जिल्ह्यातील ३६९, तर उस्मानाबाद जिल्ह्यातील ४ चारा छावण्यांचा समावेश आहे. 

बीड जिल्ह्यातील ३६९ चारा छावण्यांमध्ये आजवर मोठी १ लाख ८९ हजार १६४, तर लहान १७ हजार ३४९, अशी मिळून २ लाख ६ हजार ५१३ जनावरे दाखल झाली आहेत. उस्मानाबाद जिल्ह्यातील ४ चारा छावण्यांत १६५४ मोठी व १८५ लहान अशी मिळून १८३९ जनावरे दाखल झाली असल्याची माहिती प्रशासनाच्या सूत्रांनी दिली. मुक्‍या जनावरांच्या चारा पाण्याचा प्रश्‍न गंभीर असलेल्या जालना, परभणी, हिंगोली, लातूर, नांदेड आदी जिल्ह्यांतही या संकटावर तोडगा काढण्यासाठी कधी पावले उचलली जाणार हा प्रश्‍न आहे. 

औरंगाबादेत छावण्यांची प्रतीक्षा प्राप्त माहितीनुसार औरंगाबाद जिल्ह्यात जवळपास १६ चारा छावण्यांचे अर्ज आले होते. त्यापैकी आजवर एकही चारा छावणी मंजूर किंवा सुरू झाली नसल्याची माहिती सूत्रांनी दिली. औरंगाबाद जिल्ह्यात यंदा तुलनेने पाणीटंचाई व चाराटंचाईचा प्रश्‍न गंभीर आहे. त्यामुळे प्राप्त झालेल्या अर्ज किंवा प्रस्तावातील नेमक्‍या त्रुटी काय, त्या दूर करून मुक्‍या जनावरांना चारा पाण्याची सोय व्हावी म्हणून ताततडीने पावले उचलली जाणार का? हा खरा प्रश्‍न आहे.