नगर जिल्ह्यात वीस कोरोना रुग्ण झाले बरे

नगर ः नगर जिल्ह्यात बुधवारी (ता.२२) दोन कोरोना बाधित रुग्णांना उपचारानंतर घरी पाठवले असल्याने नगरकरांना दिलासा मिळाला. आतापर्यंत वीस रुग्ण बरे होऊन घरी गेले आहेत. मात्र असे असताना बुधवारी सायंकाळी पुन्हा जामखेड येथे दोन जणांना कोरोनाची बाधा झाली असल्याचे अहवालातून दिसून आले. त्यामुळे नगर जिल्ह्यात कोरोना बाधितांचा आकडा ३२ वर गेला आहे.   नगर जिल्ह्यात मार्च महिन्याच्या सुरुवातीला कोरोना संसर्गाची चाहूल लागली. पहिला रुग्ण १२ मार्चला आढळून आला. या परिस्थितीची सतर्कता बाळगून जिल्हाधिकारी राहुल द्विवेदी यांनी जिल्ह्यात प्रतिबंधात्मक उपाययोजना जारी केल्या. जिल्ह्यात आतापर्यंत एकूण ३२ कोरोनाबाधित रुग्ण आढळले. बाधित रुग्णांसाठी बूथ हॉस्पिटलमध्ये आयसोलेशन कक्ष स्थापन करण्यात आला. जास्त संख्येने कोरोनाबाधित व्यक्ती आढळलेली ठिकाणे हॉट स्पॉट घोषित करण्यात आली. मागील ४० दिवसांच्या कालावधीत जिल्हा प्रशासन, आरोग्य व पोलिस यंत्रणा अहोरात्र कोरोनाच्या प्रतिबंधासाठी सतर्क आहे.  या कालावधीत जिल्ह्यातील एक लाख ६० हजार व्यक्तींना क्वारंटाईन करण्यात आले. बाधित रुग्णांपैकी कोपरगाव येथील महिलेसह श्रीरामपूर व जामखेड येथील प्रत्येकी एकाचा मृत्यू झाला. उर्वरित कोरोनाबाधित आयसोलेशनमध्ये निगराणीखाली आहेत.