अकोला जिल्ह्यात ग्रामपंचायतींसाठी २४० उमेदवार रिंगणात

अकोला : आगामी एप्रिल, मे आणि जून महिन्यात मुदत संपणाऱ्या ग्रामपंचायतींची निवडणूक मुदतीपूर्वीच रविवारी (ता. २४) होईल. तर सोमवारी (ता. २५) मतमोजणी होणार आहे. निवडणुकीसाठी उमेदवारी अर्ज मागे घेण्याच्या शेवटच्या दिवशी ५० उमेदवारांनी अर्ज मागे घेतले. त्यामुळे सरपंचपदांसाठी ५२, तर सदस्यपदांसाठी १८८ उमेदवार रिंगणात राहिले आहेत. जिल्ह्यातील १७ ग्रामपंचायतींसाठी ही निवडणूक होईल.

राज्य निवडणूक आयोगाने सरपंचपदांच्या पोटनिवडणुकीसाठी २० फेब्रुवारी रोजी निवडणूक कार्यक्रम घोषित केला. यानुसार तेल्हारा तालुक्यातील अकोला रूपराव, मूर्तिजापूर तालुक्यातील कव्हाळा, किनखेड, लंघापूर, शेलूबाजार, अकोला तालुक्यातील मजलापूर, अनकवाडी, बार्शीटाकळी तालुक्यातील चोहगाव, भेंडीसुत्रक, पातूर तालुक्यातील आस्टूल, भंडारज बुद्रुक, कोठरी बुद्रुक, सांगोळा, तुलंगा बुद्रुक या ग्रामपंचायतीच्या सार्वत्रिक निवडणुका व मूर्तिजापूर तालुक्यातील विरवाडा, अकोला तालुक्यातील पाळोदी, पातूर तालुक्यातील पाडसिंगी या ग्रामपंचायतीच्या सरपंचपदासाठी थेट निवडणुकीद्वारे सरपंचपदासाठी पोटनिवडणूक होईल.

या निवडणूक कार्यक्रमानुसार नामांकन अर्ज भरण्याच्या शेवटच्या दिवशी ३०७ अर्ज दाखल झाले होते. मात्र उमेदवारी अर्ज मागे घेण्याच्या दिवशी बुधवारी (ता. १३) सरपंचपदासाठी २०, सदस्यपदांसाठी ३० इच्छुकांनी अर्ज मागे घेतले. गुरुवार (ता. १४)पासून यासाठी प्रचाराला सुरुवात झाली.

जिल्ह्यात तीन ग्रामपंचायतीच्या सरपंचपदाची निवड थेट जनतेमधून होणार आहे. यात मूर्तिजापूर तालुक्यातील विरवाडा सरपंचदासाठी तीन, अकोला तालुक्यातील पाळोदी येथे तीन, तर पातूर तालुक्यातील पाडसिंगी येथे दोन उमेदवार सरपंचदाच्या शर्यतीत रिंगणात आहेत.