ढेबेवाडी खोऱ्यात रानडुकरांकडून ज्वारीचे २५० एकरातील पीक फस्त

ढेबेवाडी, जि. सातारा : रानडुकरे आणि गव्यांच्या कळपांनी परिसरात धुमाकूळ घातला आहे. महिनाभरातच सुमारे २५० एकरातील रब्बी ज्वारीचे पीक त्यांनी फस्त केल्याचे वनविभागाकडे आलेल्या तक्रारीतून स्पष्ट होत आहे. हातातोंडाशी आलेला घास हिरावून घेतल्याने शेतकऱ्यांची स्थिती आभाळ कोसळल्यासारखी झाली आहे. 

वन्यप्राण्यांच्या उपद्रवाने हैराण झालेल्या डोंगर भागातील अनेक शेतकऱ्यांनी शेतीला रामराम ठोकल्याने पडीक क्षेत्र वर्षागणिक वाढत आहे. जवळपास खाद्य उपलब्ध होत नसल्याने वन्यप्राण्यांनी आजूबाजूच्या सपाटीच्या गावांकडे मोर्चा वळविला आहे. तेथील शेती वाचवतानाही शेतकऱ्यांच्या नाकीनऊ येत आहे. 

काळगाव परिसरात सध्या गव्यांचा, तर ढेबेवाडी खोऱ्यात रानडुकरांचा उपद्रव मोठ्या प्रमाणात वाढला आहे. रब्बी ज्वारीचे पीक काढणीला आले असतानाच शिवाराच्या शिवारे रातोरात फस्त होऊ लागल्याने शेतकऱ्यांची अवस्था तोंडचा घास हिरावल्यासारखी झाली आहे. खरिपाच्या ऐन पीक काढणीच्या वेळेलाच झालेल्या अतिवृष्टीमुळे संकरित ज्वारीचे उभे पीक जागेवरच अंकुरले. त्यामुळे शेतकऱ्यांच्या सर्व आशा रब्बी ज्वारीवरच होत्या. मात्र, वन्यप्राण्यांचा उपद्रवाने हा हंगामही वाया गेल्याची शेतकऱ्यांची भावना झाली आहे. 

दिवसभर राखणी करून आणि रात्रभरही जागता पहारा देऊन गवे व डुकरे जुमानत नसल्याचे शेतकऱ्यांचे म्हणणे आहे. काही शेतकऱ्यांची शिवारे गावापासून खूपच लांब आणि आडवळणाच्या ठिकाणी आहेत. रात्री तेथे राखणीला थांबणे शक्‍य होत नाही. तर, सकाळी भुईसपाट झालेले शिवारच त्यांच्या दृष्टीला पडत आहे.