हिंगोलीत पीकविम्याच्या प्रतीक्षेत २६ हजार शेतकरी

हिंगोली ः पंतप्रधान पीकविमा योजनेअंतर्गत राज्य हिश्‍याचे अनुदान प्राप्त झालेले नाही. त्यामुळे जिल्ह्यातील २६ हजार शेतकऱ्यांना गतवर्षीच्या खरीप हंगामात पीकनुकसानीबद्दल मंजूर १३ कोटी ६७ लाख रुपये एवढ्या परताव्याचे वाटप अजून बाकी आहे.

गतवर्षीच्या (२०२०) खरीप हंगामात जिल्ह्यातील ३ लाख ३ हजार शेतकरी पीकविमा योजनेत सहभागी झाले होते. स्थानिक नैसर्गिक आपत्ती, हंगामातील प्रतिकूल परिस्थिती, काढणी पश्चात नुकसान, उत्पादनावर आधारित नुकसान आदी निकषांआधारे पात्र १ लाख ७५ हजार शेतकऱ्यांना ९९ कोटी ५२ लाख रुपये पीकविमा परतावा मंजूर करण्यात आला. त्यापैकी १ लाख ४९ हजार लाभार्थी शेतकऱ्यांना परताव्याची ८६ कोटी २५ लाख रुपये एवढी रक्कम अदा करण्यात आली. परंतु राज्य हिस्स्याचे अनुदान प्राप्त न झाल्यामुळे २६ हजार लाभार्थी शेतकऱ्यांचे १३ कोटी ६७ लाख रुपये परताव्याच्या रकमेचे वाटप शिल्लक आहे. 

दरम्यान, पद्मश्री डॉ. विठ्ठलराव विखे पाटील कृषी परिषदेने केलेल्या मागणीनुसार,  ‘एनडीआरएफ’अंतर्गंत नुकसानभरपाईसाठी कळमनुरी तालुक्यातील ७० गावांतील शेतकऱ्यांच्या याद्या विमा कंपनीस हस्तांतरित करण्यात आल्या आहेत. उर्वरित गावातील याद्या प्राप्त होताच त्या कंपनीस हस्तांतरित करण्यात येतील. त्यानंतर विश्लेषण करून अनुदान वितरित करण्याची कार्यवाही करण्यात येईल, असे आश्वासन कृषी विभागातर्फे गुरुवारी (ता.१६) देण्यात आले होते.

परंतु, त्यावर समाधान न झाल्यामुळे परिषदेचे जिल्हाध्यक्ष अक्षय देशमुख यांच्या नेतृत्वाखाली पीकविमा परतावा प्रश्न शुक्रवारी (ता.१७) शेतकऱ्यांनी कळमनुरी - नांदेड राष्ट्रीय महामार्गावरील कामठाफाटा येथे दीडतास रास्ता रोको आंदोलन झाले. 

जिल्हा अधीक्षक कृषी अधिकारी बी. एस. कच्छवे यांनी पंधरा दिवसांत हा प्रश्न निकाली काढण्याचे लेखी आश्वासन दिल्यानंतर आंदोलन मागे घेण्यात आले.